Поранешната претседателка на Државната комисија за спречување корупција, Татјана Димитровска, која е обвинета дека оддала службена тајна на обвинетиот во случајот „Адитив“ Небојша Стојановиќ, во судница се изјасни за невина.
Таа не призна вина ниту за обвинувањето дека ревизорот Миле Столевски во нејзино име го полагал тестот според чии резултати таа добила сертификат со највисок степен на доверливост „државна тајна“.
„Јас ја разбирам содржината на обвинението и не ги признавам делата. Не се чувствувам виновна и мислам дека не сум сторила ништо за што сум обвинета“, рече Димитровска.
Димитровска ја товарат за две кривични дела: оддавање службена тајна на поранешниот директор на ТЕЦ „Неготино“, Небојша Стојановиќ, обвинет во предметот „Адитив“, како и за компјутерски фалсификат бидејќи ревизорот Миле Столевски во нејзино име го полагал тестот за добивање безбедносен сертификат за пристап до класифицирани информации.
Димитровска, која даде оставка под притисок на јавноста, сега е вработена во Државниот завод за ревизија, како помошник на државниот главен ревизор.
