Пораки извлечени од мобилни телефони на обвинети лица беа презентирани како доказ во судската постапка поврзана со Државната комисија за спречување на корупцијата, при што обвинителството тврди дека службени лица од ТЕЦ „Неготино“ споделувале доверливи информации со трети лица.
Според изведените докази, обвинетата Билјана Петровска-Мантева, како раководител во секторот за финансиски и комерцијални работи во ТЕЦ „Неготино“, преку апликацијата „Вотсап“ му доставувала податоци на Небојша Стојановиќ, кои, според обвинението, претставуваат службена тајна. Размена на службени документи, извештаи и податоци што се водат како тајни, но и пораки со приватен тон – „ај да испиеме кафе“, „частам ручек“ и „злато си“ – беа презентирани во судницата како дел од доказите во предметот.
Обвинителството пред судот ги презентираше пораките екстрахирани од телефонот на Димитровска, со кои ја товари за компјутерски фалсификат. Таа и Столевски во судница ги слушаа содржините од комуникацијата што, според обвинителот, директно покажува дека тестот бил полаган во нејзино име.
Во пораките од 22 август 2024 година, Димитровска му пишува на Столевски: „Фала Миле, частам ручек“, по што тој ѝ испраќа ПДФ-формат од сертификат и одговара: „Се шалам, не частиш ништо“. Потоа следува: „Со 93,33 ти е положен“.
На прашањето „А новиот?“, Столевски одговара дека „веќе е невалиден“ и нуди: „Да ти полагам на ново?“, на што Димитровска возвраќа: „Мислам, да“. Потоа следи комуникација во која тој најавува дека ќе го полага тестот, а подоцна испраќа нов сертификат издаден од Агенцијата за безбедност на класифицирани податоци.
На крајот од разговорот, Димитровска му пишува: „Па ај нека ни е, злато си“.
Обвинителството е децидно дека токму овие пораки ја докажуваат вината.
„Сметаме дека со изведување на овие пораки се докажа дека лицето Миле се приклучил на веб-сајтот неовластено, ги внесува податоците и го полага тестот за име и за сметка на друго лице“, изјави обвинителот Фатон Азизи од ОЈО за гонење организиран криминал и корупција.
Одбраната, пак, не ја спори комуникацијата, но тврди дека таа не е доволна за постоење кривично дело.
„Тоа што денеска го видовме не претставува дејствие кое може да биде издигнато на ниво на инкриминација... не претставува кривично дело“, изјави адвокатот Владимир Туфегџиќ.
Во истата постапка, обвинителството читаше и пораки меѓу раководителката во ТЕЦ „Неготино“, Билјана Петровска-Мантева и поранешниот директор Небојша Стојановиќ. Дел од комуникацијата, според обвинителот, била избришана, но останале пораки и фотографии од известување на БЈБ за отворена постапка на ОЈО ГОКК за набавките на мазут.
„Имаше и еден втор момент... бројот на службеното лице и комуникацијата може да претпоставите во која насока била“, рече обвинителот Азизи.
Одбраната на Мантева тврди дека документите што му ги испраќала на Стојановиќ претходно биле потпишувани од него и дека известувањето од БЈБ не било означено како строго доверливо.
Обвинителството, пак, посочува дека пораките и во овој дел се индиции за поширока истрага поврзана со набавките на мазут за ТЕЦ „Неготино“.
