Екстремно високите температури и рекордно нискиот водостој на Дунав може привремено да доведат до целосно запирање на работата на унгарската нуклеарна електрана „Пакш“, изјави унгарскиот премиер Петер Маѓар.
Тој посочи дека поради временските услови веќе се намалува производството на електрична енергија во електраната и дека постои можност таа целосно да биде исклучена во текот на денешниот или утрешниот ден.
„Постојано мораме да ги исклучуваме блоковите во „Пакш“, а можно е да биде неопходно и целосно запирање на електраната, што би значело загуба од околу 2.000 мегавати“, изјави Маѓар.
Според него, снабдувањето со електрична енергија нема да биде загрозено, бидејќи Унгарија располага со увозен капацитет од 3.600 до 3.800 мегавати, доволен за да го надомести евентуалниот недостиг.
Дополнителен проблем претставува и дефектот во термоелектраната „Дунаменти“, поради кој производството е намалено за речиси 400 мегавати. Маѓар најави дека доколку дефектот не биде отстранет, ќе бидат разгледани дополнителни мерки, меѓу кои и можноста за ротациски исклучувања или ограничување на потрошувачката во индустријата.
Во меѓувреме, унгарската државна енергетска компанија МВМ соопшти дека од 15 часот денеска е исклучен еден од четирите реактори во нуклеарната електрана „Пакш“, поради рекордно нискиот водостој на Дунав, кој обезбедува вода за ладење на постројката.
„Пакш“, која располага со четири реактори со вкупен капацитет од два гигавати и произведува речиси половина од електричната енергија во Унгарија, веќе пред два дена го намали производството и во вториот блок за 254 мегавати.
Намаленото производство ќе ја сведе работата на електраната на околу 60 проценти од нејзиниот капацитет. Истовремено, рекордно нискиот водостој на Дунав веќе предизвикува проблеми и во речниот сообраќај долж една од најважните европски пловни рути.
