Електричните автомобили сè побрзо го освојуваат германскиот автомобилски пазар, а трендот станува особено забележлив и кај половните возила, покажува анализа на осигурителната компанија HUK Coburg.
Во вториот квартал, приближно секој осми осигуреник на HUK Coburg кој сменил автомобил преминал од бензинец на целосно електрично возило. Тоа е двојно повеќе во споредба со целата мината година.
Уделот на електричните автомобили меѓу новите возила во Германија достигнал рекордни 24,9 отсто, што е за 1,8 процентни поени повеќе од претходниот рекорд, забележан во последниот квартал од 2022 година.
Особено забрзување се забележува на пазарот на половни автомобили, кој во Германија е повеќе од двојно поголем од пазарот на нови возила. Продажбата на половни електрични автомобили во вториот квартал пораснала за 7,9 отсто, што е рекордно зголемување и повеќе од двојно побрзо во однос на истиот период претходната година.
Анализата покажува и дека кон електричните автомобили особено преминуваат возачите кои поминуваат најмалку 12.000 километри годишно.
„Замавот на електромобилноста достигна нова брзина, делумно и поради наглото поскапување на горивото“, изјави Јерг Рајнлендер, член на управниот одбор на HUK Coburg задолжен за автомобилското осигурување.
Според него, половните електрични автомобили би можеле дополнително да го променат пазарот доколку и нивните купувачи добијат право на државна субвенција за набавка на електрични возила.
Во јули, најмногу целосно електрични автомобили продал „Фолксваген“ – нешто повеќе од 10.000 возила, додека од почетокот на годината бројката достигнала речиси 60.000. Следат „БМВ“ и „Шкода“, а високо на листата се и „Мерцедес“ и „Ауди“.
