Обединетите Арапски Емирати се обиделе да ги убедат соседните заливски држави, вклучувајќи ги Саудиска Арабија и Катар, да се приклучат на координиран воен одговор против Иран по неодамнешните ирански напади во регионот, но иницијативата била одбиена, објави „Блумберг“.
Според извори запознаени со разговорите, претседателот на Обединетите Арапски Емирати, шеикот Мохамед бин Зајед ал Нахјан, контактирал со регионалните лидери веднаш по почетокот на американско-израелските напади врз Иран на 28 февруари.
Мохамед бин Зајед сметал дека заливските држави треба заеднички да возвратат за да го одвратат Техеран, откако Иран претходно лансирал стотици дронови и ракети кон цели низ Заливот, меѓу кои пристаништа, аеродроми, хотели, станбени облакодери и енергетски постројки, а го затворил и Ормускиот Теснец, што предизвикало нарушувања во извозот на нафта и гас.
Но, според „Блумберг“, саудискиот престолонаследник Мохамед бин Салман и други лидери од регионот му порачале дека конфликтот „не е нивна војна“.
Одбивањето дополнително ги влошило и онака затегнатите односи меѓу Абу Даби и Ријад.
За време на разговорите, Мохамед бин Зајед наводно потсетил дека Советот за соработка во Заливот бил основан во 1981 година делумно и поради стравувањата од Иранската исламска револуција.
Сепак, Катар, Бахреин, Кувајт, Оман и Саудиска Арабија на крајот одбиле да се приклучат на координирана воена акција против Иран.
Катар, според извештајот, размислувал за одмазда по иранскиот напад врз постројката за течен природен гас „Рас Лафан“ во март, но подоцна се насочил кон дипломатски напори за смирување на тензиите.
По неуспехот да ги обедини заливските сојузници, Обединетите Арапски Емирати самостојно извеле ограничени удари врз Иран и ја продлабочиле безбедносната соработка со Израел.
„Блумберг“ наведува дека соработката вклучувала размена на разузнавачки информации, системи за рано предупредување и пресретнување ракети за време на конфликтот.
Обединетите Арапски Емирати биле меѓу најчестите цели на иранските напади, а Техеран кон таа земја лансирал речиси 3.000 дронови и ракети пред во април да биде постигнат прекин на огнот.
Во меѓувреме, Иран ги обвини Обединетите Арапски Емирати дека го поддржуваат воениот напад што САД и Израел го водат против Техеран.
Иранскиот министер за надворешни работи Абас Арагчи на самитот на БРИКС во Индија изјавил дека Обединетите Арапски Емирати се „активен учесник во агресијата“.
Претходно, „Волстрит журнал“ објави дека Обединетите Арапски Емирати тајно извеле воени удари врз Иран, вклучувајќи и напад врз голема иранска нафтена рафинерија.
Американскиот претседател Доналд Трамп изјави дека кревкиот прекин на огнот меѓу САД и Иран сè уште е на сила, но дека „едвај опстојува“, притоа оценувајќи го најновиот ирански мировен предлог како „целосно неприфатлив“.
