Националната авиокомпанија Ер Србија е прогласена за „Лидер на воздухопловниот пазар“ во рамките на 52-то издание на ATW наградите за достигнувања во воздухопловната индустрија, што ги доделува Air Transport World (ATW), светски медиум специјализиран за воздушниот сообраќај.
Според соопштението на Ер Србија, глобалната награда се смета за едно од значајните признанија во воздухопловството, бидејќи ги издвојува компаниите што остваруваат забележителни резултати, покажуваат лидерство во индустријата и поставуваат стандарди за квалитет и иновации.
Покрај Ер Србија, меѓу годинашните добитници се и познати воздухопловни компании како American Airlines, Air France, Royal Jordanian, LATAM Airlines, Scoot, Jet2 и Cathay Cargo.
Главниот извршен директор на Ер Србија, Јиржи Марек, изјави дека признанието претставува особена чест за компанијата и потврда за нејзината улога како национален авиопревозник на Србија.
„Да бидеме прогласени за лидер на воздухопловниот пазар е особена чест за нас и доказ дека Ер Србија, како национална авиокомпанија на Србија, е горд амбасадор на својата земја ширум светот. Во годината во која продолживме одлучно да ја прошируваме нашата мрежа и воведовме нови директни летови кон клучни дестинации ширум светот, нашата цел е да ја претставуваме Србија на најдобар можен начин и да обезбедиме таа да биде препознаена на највисоко светско ниво“, рече Марек.
Тој нагласи дека наградата е признание за трудот на тимот професионалци кој секојдневно работи на подобрување на квалитетот на услугите и искуството на патниците, придонесувајќи за поврзување на Србија со светот.
„Уверен сум дека во наредниот период ќе продолжиме да поставуваме амбициозни цели и дополнително да ги унапредуваме сите аспекти од нашето работење“, додаде Марек.
Главната и одговорна уредничка на ATW, Карен Вокер, изјави дека жири составено од уредници и аналитичари убедливо гласало Ер Србија да ја добие наградата за лидер на воздухопловниот пазар за 2027 година.
„Тимот на Ер Србија напорно работеше на растот и унапредувањето на компанијата, обезбедувајќи значајна воздушна поврзаност во централноевропскиот регион и пошироко. Честитки до Ер Србија и нејзиното раководство“, изјави Вокер.
Air Transport World (ATW) е еден од водечките светски медиуми специјализирани за глобалниот воздушен сообраќај и е дел од Aviation Week Network, која работи во рамките на групацијата Informa. ATW наградите имаат традиција подолга од пет децении.
Доделувањето на наградите ќе се одржи на 10 декември во Милано, во рамките на Светскиот самит на лидери во авиокомпаниите CAPA за 2026 година.
