Турскиот претседател Реџеп Таип Ердоган се сретна во Истанбул со својот романски колега Никушор Дан, соопшти Кабинетот на турскиот претседател.
Средбата се одржа во Командата на истанбулското бродоградилиште, по церемонијата за примопредавање на патролен брод на романските поморски сили, објави турската новинска агенција Анадолија.
Според соопштението, разговорите се одржаа зад затворени врати по свеченото предавање на патролниот брод ТЦГ „Акхисар“ / ОПВ „Чам. Роман“.
На средбата присуствуваа и турскиот министер за национална одбрана Јашар Ѓулер, министерот за внатрешни работи Мустафа Чифтчи, началникот на Генералштабот, генерал Селчук Бајрактароглу, директорот за комуникации Бурханетин Дуран, како и главниот советник на претседателот за безбедносна и надворешна политика, амбасадорот Акиф Чагатај Килич.
Од Кабинетот на турскиот претседател не беа соопштени дополнителни детали за темите на разговор меѓу двајцата претседатели.
