Конфликтот меѓу САД и Иран повторно ескалира, откако Техеран утрово соопшти дека извршил ракетен напад врз база во Јордан што ја користи американската војска, а истовремено нападнал и 10 бродови во Ормускиот Теснец. Нападите следуваат еден ден откако американските сили објавија дека уништиле пет ирански танкери за нафта.
Засилените воени дејствија го прекинаа периодот од околу еден месец на релативно затишје во шестмесечната војна. Новите напади ги погодија воената и поморската инфраструктура и енергетските капацитети, со што повторно се зголемија цените на нафтата и се зголеми ризикот конфликтот да ги вовлече регионалните сојузници.
Иранската револуционерна гарда (ИРГЦ) соопшти дека испукала балистички ракети кон база во близина на Ал Азрак во Јордан, која ја користат американските сили. Иранските власти тврдат дека нападот предизвикал значителна штета.
Јордан, пак, соопшти дека неговата воздушна одбрана пресретнала 18 од вкупно 20 ирански ракети, додека две паднале во ненаселени области. Според јорданските власти, нема жртви. Американски претставник изјави дека нападот бил неефикасен и дека сите американски војници се безбедни.
ИРГЦ подоцна соопшти дека нападнала и 10 бродови – два американски и осум танкери за нафта – кои, според Техеран, се обидувале да поминат низ забранета и небезбедна област во Ормускиот Теснец, еден од најважните светски енергетски коридори, кој во голема мера е блокиран поради иранските напади.
Американската војска претходно објави дека уништила пет ирански танкери за нафта. Централната команда објави и снимки од операциите, наведувајќи дека тие биле одговор на два напади со балистички ракети врз американски воен брод во претходните два дена. Од САД соопштија дека нема повредени американски војници.
„Иран продолжува да се обидува да ги погоди американските воени бродови и секогаш кога ќе го направат тоа или ќе се обидат, ќе изгубат танкери“, изјави американскиот државен секретар Марко Рубио.
Тензиите се проширија и кон другите делови од регионот. Иран претходно им се закануваше на танкерите за нафта во пристаништата во Кувајт и Бахреин, додека извор од поморската безбедност соопшти дека танкер со течен природен гас бил оштетен во пристаништето Хор Факан во Обединетите Арапски Емирати. Засега не е познато кој стои зад тој напад.
Дополнителна закана за регионалната стабилност претставуваат и нападите на Хутите во Саудиска Арабија. Во вторникот тие извршија напади врз неколку саудиски градови, при што, според достапните информации, биле повредени 73 лица и биле предизвикани пожари на нафтени објекти.
Хутите соопштија дека започнале широка операција длабоко на територијата на Саудиска Арабија, користејќи беспилотни летала и ракети. Како цели ги наведоа саудиската воздухопловна база во Хамис Мушаит и објекти на државната нафтена компанија во Абха, Наџран и Џазан.
Саудиските власти потврдија дека избувнале пожари на погодените места и соопштија дека меѓу повредените има и жени и деца.
Саудиска Арабија повеќе од една деценија предводи арапска коалиција во војната против Хутите во Јемен. Иако конфликтот во последните години беше во мирување, новата ескалација повторно го загрозува прекинот на огнот.
Поширокиот конфликт во регионот сè повеќе се претвора во економски и воен тест меѓу Вашингтон и Техеран. Двете страни се обидуваат преку економски притисок и блокади да ја принудат спротивната страна да попушти.
САД се обидуваат да го одржат протокот на нафта кон светските пазари преку обезбедување премин на бродови низ Ормускиот Теснец, додека истовремено со блокада го ограничуваат извозот на иранска нафта.
Американската Централна команда соопшти дека петте уништени танкери биле дел од мрежа за прикриен транспорт на нафта, за која тврди дека обезбедува финансиска поддршка за ИРГЦ и нејзините регионални сојузници.
Иран со години ја поддржува таканаречената „Оска на отпорот“, во која се вклучени Хамас, Хезболах, ирачки шиитски милиции и Хутите.
