Канадските царини за низа американски производи стапија во сила како одговор на новите царини што Вашингтон ги воведе кон крајот на август, што укажува дека засега нема знаци на смирување на трговскиот спор меѓу двете земји.
Новите царини од 15, 25 и 50 проценти опфаќаат американска стока вредна околу 20 милијарди долари, меѓу кои челик, млечни производи, електроника и суровини за производство на хартија.
Канадскиот премиер Марк Карни изјави дека мерките се неопходни за заштита на работниците и компаниите, но нагласи дека неговата земја не сака ескалација на спорот.
„Неактивноста би имала многу поголема цена“, порача Карни, додавајќи дека за иднината на Канада „нема да се одлучува во Вашингтон“.
Трговскиот спор меѓу двете соседни земји ескалираше откако Карни на 21 август ги прекина преговорите со Белата куќа. Тој ги обвини САД дека се обидуваат да наметнат „неправеден“ договор и дека сакаат Канада да ја претворат во американска „подружница“.
Како една од причините за прекинот на преговорите, Карни го посочи и барањето на Вашингтон Канада да го укине задолжителното двојазично означување на американските производи што се продаваат во земјата.
