ЕСМ ќе понуди иста цена на струјата како лани, ќе се спречува и големо поскапување на парното, најави Мицкоски

Премиерот Христијан Мицкоски најави дека државната компанија АД ЕСМ ќе понуди иста цена на електричната енергија како и минатата година, со цел да се избегне поскапување на струјата за граѓаните. Тој најави и напори за спречување големо зголемување на цената на парното греење.

— реклама —

Одговарајќи на новинарско прашање за цените на енергенсите, Мицкоски оцени дека состојбата на европските пазари е алармантна, со оглед на високите берзански цени на струјата и гасот. Според него, цената на електричната енергија достигнува и над 400 или 500 евра за мегават-час, додека гасот повторно надминал 90 евра за мегават-час.

— реклама —

Тој посочи дека Владата, преку АД ЕСМ, подготвила деловен модел со кој ќе се задржи досегашната цена на електричната енергија, а компанијата до крајот на 2027 година ќе цели кон остварување добивка.

— реклама —

Во однос на парното греење, Мицкоски рече дека барањето за зголемување на цената е значително, а цената на гасот е трипати повисока од онаа во истиот период минатата година. Сепак, најави дека Владата ќе се обиде да го ограничи поскапувањето на ниво што граѓаните ќе можат да го поднесат.

— реклама —

Мицкоски нагласи дека приоритет на Владата е заштитата на животниот стандард и дека, и покрај тешката состојба на енергетските пазари, засега успеваат да го ублажат притисокот врз цените со мерките што им стојат на располагање.