Поради ерупцијата на вулканот Етна е нарушен воздушниот сообраќај на аеродромот „Винченцо Белини“ во Катанија, откако облак од вулканска пепел и фонтана од лава од кратерот Вораџине го зафатија подрачјето над аеродромот.
Поради исфрлањето вулканска пепел во атмосферата и затворањето на воздушниот простор во правец на југозапад, кризниот штаб на компанијата SAC, која управува со аеродромите во Катанија и Комизо, ја продолжи суспензијата на пристигнувачките летови до 16 часот, пренесува порталот „Сицилија“.
Претходно беше најавено дека забраната ќе трае до пладне.
Ограничувањата не се однесуваат на поаѓачките летови на авионите кои веќе се наоѓаат на аеродромот.
За да им се олесни на патниците продолжувањето на патувањето, италијанската железничка компанија „Трениталија“ воведе вонредни железнички линии.
На патниците чии летови се погодени од прекинот им беше советувано да се упатат кон железничката станица кај аеродромот во Палермо, од каде што е обезбеден вонреден воз без попатни запирања до главната станица „Палермо Чентрале“.
Уште еден вонреден воз тргна од Палермо во 9:15 часот, преку Месина, кон Катанија, со капацитет од 500 места.
