Европската Унија одобри 140,5 милиони евра неповратна финансиска помош за Босна и Херцеговина во рамките на Инструментот за претпристапна помош (ИПА III) за периодот од 2025 до 2027 година.
Од Делегацијата на Европската Унија во Сараево соопштија дека ЕУ останува најзначаен и најдоследен партнер на Босна и Херцеговина, потсетувајќи дека претходно годинава Советот на министри и Претседателството на БиХ го ратификувале договорот со Унијата.
Средствата се наменети за поддршка на реформите потребни за усогласување на земјата со европските правила и стандарди. Финансиската помош ќе биде насочена кон проекти за економски развој, реформа на јавната администрација и институциите, управување со миграцијата, одржливо земјоделство, прехранбениот сектор и други области важни за процесот на пристапување во Европската Унија.
ИПА III е главниот финансиски инструмент преку кој Европската Унија ги поддржува земјите кандидати и потенцијалните кандидати во спроведувањето на реформите поврзани со евроинтегративниот процес. Неговата цел е да придонесе за зајакнување на институциите, подобро управување, поголема конкурентност на економијата и постепено усогласување на законодавството со европското право.
