Киев денеска е во центарот на европското внимание, откако повеќе европски лидери пристигнаа во украинската престолнина на одбележувањето на 35-годишнината од независноста на земјата. Во исто време, Европската Унија и Велика Британија најавија нова воена поддршка за Украина во нејзината одбрана од руската инвазија.
Меѓу гостите во Киев е и претседателот на Европскиот совет, Антонио Кошта, откако Европската Унија одобри нова транша од 6,1 милијарда евра за Украина. Средствата ќе бидат наменети за противвоздушна одбрана, ракети, муниција и радарски системи.
Помошта е дел од поширокиот заем на ЕУ во вредност од 90 милијарди евра за 2026 и 2027 година, со кој Унијата планира да ја поддржи Украина во одбраната од руските сили.
Дополнителна поддршка најави и Велика Британија. Британскиот премиер Енди Бурнам, во пресрет на своето прво меѓународно патување, соопшти дека Лондон ќе му помогне на Киев во развојот на производството на ракети со долг дострел „Скалп“, преку споделување на нацртите за британските компоненти.
„Скалп“ се француската верзија на британските ракети „Сторм шедоу“, кои украинските сили ги користат за напади врз цели во Русија. Киев и Париз, во меѓувреме, планираат воспоставување локални производствени линии за овие ракети на украинска територија.
Плановите на Велика Британија и Украина предизвикаа остра реакција од Москва. Портпаролот на Кремљ, Дмитриј Песков, го обвини Лондон дека со ваквите чекори „долева масло на огнот“ и дополнително ја продлабочува војната.
Украина Денот на независноста го одбележува на 24 август, во спомен на Декларацијата за независност од Советскиот Сојуз, која беше усвоена во 1991 година.
Во своето обраќање по повод празникот, украинскиот претседател Володимир Зеленски испрати остри пораки до рускиот претседател Владимир Путин, оценувајќи дека Русија го потценила украинскиот народ и неговата подготвеност да се брани.
Според Зеленски, Москва во своите планови за Украина ја направила најголемата грешка токму во проценката на украинскиот народ. Тој оцени и дека намерата на Путин да ја направи Русија голема не се реализирала, посочувајќи на проблемите со снабдувањето со гориво и загубите на руските сили на бојното поле.
Сепак, украинскиот претседател призна дека состојбата во земјата е „навистина многу тешка за сите нас“. Тој повторно го отфрли барањето Москва да добие контрола врз регионот Доњецк, оценувајќи дека таквиот чекор нема да стави крај на војната.
– Никој не верува дека тоа би ја запрело војната. Ние не им веруваме. Украина стана поинаква земја и нема да се откаже од ништо. Земјата не е жртва, туку борец – порача Зеленски.
