Европската Унија подготвува нови мерки за намалување на економската зависност од Кина и заштита на европската индустрија од евтин увоз, пишува „Политико“.
Според интерен документ на Европската комисија, Брисел планира поостра трговска политика кон Пекинг и можни нови истраги за увоз што ѝ штети на европската економија.
Една од опциите е воведување царински квоти за дополнителни индустриски сектори, по примерот на мерките што веќе важат за челикот и феролегурите.
Европската комисија размислува и за нов механизам против прекумерното кинеско производство поддржано со државни субвенции, што според Брисел создава нелојална конкуренција за европските компании.
Плановите ќе бидат разгледувани на состанок на европските комесари кон крајот на мај, а потоа и на самитите на Г7 и Европскиот совет во јуни.
Во меѓувреме, трговскиот дефицит на Европската Унија со Кина достигна 359,3 милијарди евра во 2025 година, што е речиси 20 проценти повеќе од претходната година.
Брисел стравува од забрзана деиндустријализација, особено во автомобилската, хемиската и технолошката индустрија, поради растечкиот увоз на поевтини кинески производи.
Како дел од новата стратегија, Европската Унија веќе најави ограничувања за користење кинеска технологија во енергетиката и построги правила за кинеските инвестиции и телекомуникациска опрема.
