Министрите за внатрешни работи на земјите-членки на Европската Унија денеска се состануваат во Луксембург, каде што главни теми ќе бидат спроведувањето на Пактот за миграција и азил, враќањето на мигрантите во трети земји и состојбата во шенгенскиот простор.
На состанокот ќе се разговара и за предлогот за воспоставување механизам за итно дејствување во случај на ненадеен и масовен прилив на мигранти, по примерот на ситуацијата што летово се случи во шпанската енклава Сеута.
Една од разгледуваните можности е да се овозможи привремено запирање на постапките за одобрување азил во ситуации кога миграцијата се користи како средство за притисок или кога се соочуваат со масовни пристигнувања.
„Европа треба да ги има потребните средства за заштита на своите граници во сите околности, особено во сценарија во кои масовните движења се организираат и се користат против ЕУ“, изјавил еврокомесарот за внатрешни работи, Магнус Брунер.
Министрите се очекува да усвојат и регулатива со која ќе се овозможи воспоставување центри за враќање на мигранти во трети земји.
На дневен ред ќе биде и состојбата во шенгенскиот простор, во рамките на пошироките разговори за управувањето со надворешните граници и миграцијата во Европската Унија.
