Претседателката на Европската комисија, Урсула фон дер Лајен, оцени дека сцените од шпанската ексклава Сеута се неприфатливи и порача дека Европската Унија нема да дозволи нелегални влегувања на својата територија.
„Не можеме да дозволиме кој било да влегува во Унијата без да ги почитува нашите правила. Опасните илегални преминувања на границите мора веднаш да престанат, а мрежите за криумчарење луѓе мора да бидат разбиени. Враќањето на лицата кои немаат право да останат треба да биде брзо и во согласност со европските правила“, изјави Фон дер Лајен.
Таа соопшти дека го задолжила еврокомесарот за внатрешни работи и миграција, Магнус Брунер, да ѝ помогне на Шпанија во справувањето со кризата, вклучително и преку агенцијата Фронтекс. Истовремено, еврокомесарката за Медитеранот, Дубравка Шуица, е во постојан контакт со мароканските власти.
Според проценките на шпанските власти, околу 49.000 мигранти во последните 24 часа по копнен и морски пат преминале од Мароко во Сеута. Најмалку 24 лица загинале при обидот да стигнат до шпанската територија.
Масовниот прилив следуваше по неодамнешната одлука на Врховниот суд на Шпанија, според која мигрантите пресретнати на море при обид да стигнат до Сеута или Мелилја не можат веднаш да бидат вратени во Мароко.
Шпанскиот премиер Педро Санчез ја оцени ситуацијата како „напад“ и порача дека Владата работи сите мигранти кои нелегално влегле во земјата да бидат вратени во Мароко што е можно побрзо.
Случувањата во Сеута предизвикаа загриженост кај повеќе европски лидери, а дел од нив најавија дополнително зајакнување на граничните контроли. Сеута, која се наоѓа на северниот брег на Мароко, е една од главните влезни точки за мигрантите што се обидуваат да стигнат до Европската Унија.
