ЕУ со најголема мобилизација досега против шумските пожари: Распоредени 777 пожарникари и 27 летала

Европската комисија ја претстави најголемата досега координирана операција за справување со шумски пожари, со која стотици пожарникари и десетици летала ќе бидат распоредени низ јужна Европа пред почетокот на летната сезона, пишува Екатимерини.

— реклама —

Според планот, вкупно 777 пожарникари од 14 земји ќе бидат стратешки распоредени во Грција, Кипар, Италија, Франција, Шпанија и Португалија, кои се сметаат за најризични подрачја за појава на големи пожари.

Поддршка ќе обезбедуваат и 22 противпожарни авиони и пет хеликоптери од заедничката европска флота за итни интервенции.

— реклама —

Оперативната координација ќе ја врши Координативниот центар за итни реакции на Европската Унија, кој ќе обезбедува 24-часовен мониторинг и управување со активностите врз основа на метеоролошки податоци и процени на ризик.

— реклама —

Дополнително, преку сателитскиот систем „Коперникус“ и Европскиот информативен систем за шумски пожари ќе се врши мапирање и прогнозирање на потенцијалните жаришта.

Европската Унија најави и отворање на регионален центар за координација на борбата против шумските пожари во Кипар во текот на 2026 година. Центарот ќе служи за сместување на летала, обука на персонал и подобрување на подготвеноста во источниот Медитеран.

— реклама —

Механизмот за цивилна заштита на ЕУ овозможува прекугранична помош во случаи кога националните капацитети не се доволни за справување со големи природни катастрофи.