ЕУ со препораки до граѓаните: Подгответе резерви од храна и вода за најмалку 72 часа

Европската комисија објави нови препораки со кои ги повикува граѓаните на Европската Унија да бидат подготвени за вонредни ситуации и природни катастрофи, обезбедувајќи резерви од храна, вода и основни потреби за најмалку 72 часа, додека не пристигне организирана помош.

— реклама —

Насоките беа претставени на Европскиот форум за цивилна заштита во Брисел од еврокомесарката за подготвеност и управување со кризи, Хаџа Лахбиб. Таа нагласи дека првите часови во кризна ситуација се пресудни и дека секој граѓанин треба да знае како да го заштити своето семејство и да им помогне на другите.

Една од главните препораки е секое домаќинство да има подготвени залихи за три дена, како и однапред спакувана торба или ранец со најнеопходните работи за случај на итна евакуација.

— реклама —

Препораките опфаќаат и едукација за справување со кризи во градинките и училиштата, соодветна заштита на лицата со попреченост, како и побрзо и појасно информирање на јавноста за можните опасности.

— реклама —

Европската комисија предложи и воспоставување на Европски ден на подготвеност, кој би се одбележувал секоја година на 23 октомври, почнувајќи од 2027 година. Целта е да се подигне свеста за ризиците и да се поттикнат граѓаните и локалните власти редовно да вежбаат и да се подготвуваат за вонредни состојби.

Покрај препораките за граѓаните, Брисел ги повика и земјите членки редовно да спроведуваат проверки на подготвеноста на службите за цивилна заштита. Тие треба да обезбедат непречено функционирање и координација на помошта, дури и при прекини на електричната енергија, комуникациските мрежи или кибернетички напади.

— реклама —

Иако насоките не се правно обврзувачки, тие се дел од пошироката стратегија на ЕУ за зајакнување на отпорноста на кризи, поттикната и од предупредувањата за зачестени климатски непогоди и геополитички закани.