ЕУ во јануари ќе разгледува нови мерки против Грузија поради влошувањето на демократските стандарди

Европската унија во јануари ќе ги разгледува можните дополнителни мерки против Грузија поради влошувањето на демократските стандарди и ограничувањето на основните права во земјата. Ова го најави високата претставничка на ЕУ за надворешна политика и безбедност, Каја Калас, посочувајќи дека грузиската влада се оддалечува од европскиот пат.

— реклама —

Калас, при претставувањето на годишните извештаи на Европската комисија за напредокот на земјите кандидати, оцени дека потезите на властите во Тбилиси не се во добра насока. Таа нагласи дека јануарската расправа ќе овозможи усогласување на ставовите на земјите членки за начинот на кој ЕУ треба да одговори.

Засега не е познато дали ќе бидат предложени нови санкции. Калас истакна дека Унијата треба истовремено да ја поддржи грузиската јавност и нејзините европски стремежи, но и јасно да ѝ порача на владата дека не ја одобрува нејзината политика.

— реклама —

Европската комисија во извештајот констатираше дополнително назадување на демократијата во Грузија, вклучително и нови ограничувања на граѓанскиот простор и влошување на состојбата со основните права.

— реклама —

Во 2024 година, дипломатската служба на ЕУ предложи санкции за грузиските функционери одговорни за насилното задушување на мирните протести, но Унгарија и Словачка го блокираа нивното усвојување. Во меѓувреме, Брисел го суспендираше безвизниот режим за носителите на грузиски дипломатски пасоши. Мерката стапи во сила во март 2026 година и важи една година, со можност за продолжување за најмногу уште две години.

Односите дополнително се влошија откако грузиските власти во ноември 2024 година соопштија дека нема да настојуваат да ги отворат пристапните преговори со ЕУ пред крајот на 2028 година.

— реклама —

Грузискиот премиер Иракли Кобахидзе на самитот на ЕУ за проширувањето изјави дека останува посветен на европскиот пат на земјата, но не претстави конкретен план за подобрување на односите со Брисел.