Евакуиран крузер со над 1.500 лица по дојава за бомба кај грчкиот остров Сирос

Повеќе од 1.500 патници и членови на екипажот беа евакуирани од крузерот „Crown Iris“, кој требало да исплови од грчкото пристаниште на островот Сирос кон Хаифа во Израел, по анонимна дојава за поставена бомба.

— реклама —

Според грчкиот јавен сервис ЕРТ, дојавата се покажала како лажна. По завршувањето на безбедносната проверка, на бродот не бил пронајден експлозив, по што на патниците им било дозволено повторно да се качат.

— реклама —

На крузерот, кој плови под панамско знаме, имало 940 патници и 597 членови на екипажот. Евакуацијата на вкупно 1.537 лица започнала нешто по 19 часот по локално време, а патниците биле сместени во објекти обезбедени од општините Сирос и Ермуполи додека траела проверката.

Заканата била испратена преку радиоврска од непознато лице, кое соопштило дека на подводниот дел од бродот има експлозивна направа. Капетанот веднаш ги известил пристанишните власти, по што припадници на крајбрежната стража започнале претрес.

— реклама —

Во акцијата учествувале и приватен нуркач, куче обучено за откривање експлозив и специјална единица на крајбрежната стража.

— реклама —

Дојавата за крузерот пристигнала истиот ден кога најмалку седум авиони низ Европа добиле закани за поставени бомби. Заканите предизвикале застои во воздушниот сообраќај, но ниту во еден од случаите не бил пронајден експлозив.