Првата бугарска комеморативна монета од две евра, која требаше да стане симбол на влезот на Бугарија во еврозоната, се најде во центарот на неочекуван европски спор. Причината е формален приговор поднесен од засега непозната земја-членка на Европската Унија, со што е блокирано одобрувањето на предложениот дизајн посветен на кирилицата.
Според јавно достапните информации, Бугарија предложила монетата да биде посветена на „бугарската азбука“, со намера да ја истакне историската улога на кирилицата како дел од бугарското културно наследство. Токму ваквата формулација, според шпекулациите во дел од европските медиуми и нумизматичките кругови, би можела да биде причината за поднесениот приговор.
Случајот предизвика дополнително внимание откако Советот на ЕУ одби да открие која држава го оспорила дизајнот, како и содржината на приговорот. Од институцијата единствено посочиле дека станува збор за „многу чувствителен процес на донесување одлуки“ и дека објавувањето на деталите би можело да влијае врз постапката.
Холандскиот аналитичар и консултант Рајниер Јарсма на социјалната мрежа Икс објави дека непозната членка на Унијата официјално се спротивставила на бугарскиот предлог. Тој објави и документи од крајот на мај годинава, од кои, како што тврди, произлегува дека постапката за одобрување на монетата е запрена.
Во јавноста веќе се појавија различни претпоставки за причините зад блокадата, а дел од бугарските медиуми ја поврзуваат со чувствителните историски и идентитетски прашања меѓу Македонија и Бугарија.
Бугарија со години го застапува ставот дека современата кирилица се развила во рамките на Првото бугарско царство и Преславската книжевна школа, претставувајќи ја како еден од најзначајните бугарски придонеси кон европската цивилизација.
Од друга страна, во Македонија кирилицата, како и светите браќа Кирил и Методиј, се сметаат за дел од националниот идентитет и поширокото словенско културно наследство. Македонскиот јазик и неговото кирилско писмо се утврдени како официјален јазик и писмо со Уставот на државата.
Поради поднесениот приговор, предложениот дизајн не го добил потребното одобрување, а Софија сега има неколку можности – да постигне компромис, да го измени постојниот дизајн или да предложи сосема ново решение.
Бугарија од 1 јануари 2026 година официјално го воведе еврото и стана 21. членка на еврозоната.
