Европската комисија не ги менува правилата за EEС, патниците ќе се соочуваат со подолги контроли

Европската комисија одлучи да не прави отстапки во примената на новиот Систем за влез и излез (EEС), и покрај барањата од авиокомпаниите и аеродромите за привремено олеснување на контролите поради големиот број патници во летната сезона.

— реклама —

Одлуката значи дека и граѓаните на Македонија, при патување во земјите од Шенген-зоната, ќе продолжат да поминуваат низ задолжителните биометриски проверки, без разлика на тоа преку кој граничен премин влегуваат.

Воздухопловната индустрија предложила на најоптоварените аеродроми и гранични премини привремено да се намалат проверките за да се избегнат долги редици, но Европската комисија оценила дека таков пристап би довел до различни правила во земјите членки и би ја нарушил единствената примена на системот.

— реклама —

За македонските патници остануваат непроменети правилата за престој во Шенген – дозволен е престој до 90 дена во период од 180 дена. Сепак, при секое влегување и излегување ќе се врши скенирање на патната исправа, фотографирање, земање отпечатоци од прсти при првата регистрација и електронско евидентирање на преминувањето на границата.

— реклама —

Од Меѓународната асоцијација за воздушен транспорт (IATA) предупредуваат дека ваквите проверки веќе предизвикуваат доцнења и пропуштени летови во повеќе европски земји, додека „Рајанер“ алармира за застои на аеродромите во популарните туристички центри.

Европската комисија наведува дека досега преку системот се регистрирани околу 110 милиони влезови и излези, а на повеќе од 44.500 лица им бил одбиен повторен влез во Шенген поради прекршување на правилата за престој или користење фалсификувани документи.

Поради тоа, на патниците од Македонија им се препорачува да планираат повеќе време за преминување на границите и да пристигнуваат порано на аеродромите, особено во периодите со засилен туристички сообраќај.