Европскиот суд ја потврди казната од 4,1 милијарда евра за Google

Највисокиот суд на Европската Унија ја одби жалбата на Google и ја потврди казната од 4,1 милијарда евра што Европската комисија ја изрече поради злоупотреба на доминантната позиција на оперативниот систем Android.

— реклама —

Првичната казна од 4,3 милијарди евра беше изречена во 2018 година, а во 2022 година беше намалена на 4,1 милијарда евра. Google поднесе жалба на таа одлука, но судот сега ја одби, со што казната останува на сила.

— реклама —

Од Google соопштија дека пресудата не ги зема предвид инвестициите што компанијата ги направила за Android да остане отворен, интероперабилен и бесплатен, додавајќи дека уште во 2018 година ги усогласиле договорите со барањата на Европската комисија.

— реклама —

Според Европската комисија, Google ги прекршил правилата за конкуренција на три начини: ги обврзувал производителите на Android-уреди однапред да ги инсталираат Google Search и Chrome за да добијат пристап до Google Play, им плаќал на производители и мобилни оператори ексклузивно да го инсталираат Google Search и ги спречувал производителите да продаваат уреди со алтернативни верзии на Android доколку сакале да ги користат неговите апликации.

Ова е најголемата парична казна што Европската комисија досега ја изрекла на Google. Компанијата и претходно беше санкционирана од Европската Унија поради злоупотреба на доминантната пазарна позиција во други случаи поврзани со услугите за споредба на цени и онлајн рекламирање.