Европските институции под притисок поради протестите на младите

Европските влади и институции треба посериозно да ги сфатат барањата на младите кои протестираат поради станбената криза, сиромаштијата и неизвесната иднина, наместо незадоволството да го поврзуваат исклучиво со насилството. Ова го порача претседателот на Европскиот економски и социјален комитет, Шеамус Боланд, во Брисел.

„Да не ги осудуваме младите затоа што ги изразуваат своите ставови и загриженоста за иднината. Тие се иднината“, изјави Боланд, осврнувајќи се на протестите во европските градови, меѓу кои Париз, Даблин и Атина.

— реклама —

Според него, фактот што студентите мора да излегуваат на улиците за да бидат слушнати покажува дека институциите треба да воспостават систематски механизми за дијалог со младите. Тој предупреди дека тие не веруваат оти нивните пораки стигнуваат до парламентите и институциите.

Боланд го осуди насилството и ги повика демонстрантите да го избегнуваат, но нагласи дека властите не смеат да дозволат насилните инциденти да ги засенат причините за протестите.

— реклама —

Меѓу главните проблеми ги посочи недостапното домување, отежнатиот пристап до здравствена заштита и образование, како и високото ниво на сиромаштија. Според него, луѓето што не можат да обезбедат дом или соодветни услови за своите деца имаат причини да ја губат довербата во институциите.

— реклама —

Тој ги повика европските лидери да ја препознаат сериозноста на станбената криза и да разгледаат прогласување вонредна состојба на европско ниво. Боланд оцени дека постојните иницијативи за решавање на проблемот се чекор напред, но не се доволни без долгорочно финансирање на изградбата на социјални и достапни станови.

Како дополнителни предизвици ги посочи моделите на кредитирање, улогата на банките, недостигот од квалификувани работници и прописите што ја забавуваат изградбата.

Претседателот на Европскиот економски и социјален комитет изрази загриженост и поради можноста за намалување на средствата за социјални политики во идниот повеќегодишен буџет на Европската Унија. Тој предупреди дека занемарувањето на социјалните потреби може дополнително да ја ослабне довербата во европските институции.

Во ЕУ се водат преговори за буџетот за периодот од 2028 до 2034 година, при што неколку побогати земји, меѓу кои Германија и Холандија, бараат намалување на заедничкиот буџет.