Со почетокот на летната сезона и зголемениот број туристи на европските плажи, расте и загриженоста поради ширењето на бактеријата вибрио, позната и како „бактерија што јаде месо“, пренесува Euronews.
Во последните години, повеќе делови од европското крајбрежје се соочија со загадување и здравствени предупредувања, што во некои случаи доведе и до привремено затворање на плажи. Годинава, неколку плажи во Шпанија веќе беа затворени поради присуство на опасни бактерии во морската вода.
Според експертите, зголемувањето на температурата на морската вода, загадувањето и интензивниот туризам создаваат идеални услови за размножување на бактеријата вибрио. Аналитичарот за климатски промени и енергетска отпорност во Унијата за Медитеранот, Хатим Азнаг, за Euronews изјавил дека Медитеранот претставува „преглед на иднината“ во услови на климатски промени и е едно од морињата што најбрзо се загреваат во светот.
Европската агенција за безбедност на храната предупредува дека некои видови на бактеријата можат да предизвикаат сериозни здравствени последици, од гастроентеритис до тешки инфекции, па дури и смрт. Инфекцијата може да се пренесе преку консумирање сурови морски плодови или преку контакт на морската вода со отворени рани.
Во потешки случаи, бактеријата може да предизвика некротизирачки инфекции, при што доаѓа до брзо уништување на ткивото, а во одредени ситуации е неопходна и ампутација на зафатениот екстремитет.
Европскиот центар за превенција и контрола на болести предупредува дека ризикот од инфекции со вибрио значително се зголемува за време на топлотни бранови, особено во плитките крајбрежни води.
Покрај здравствените ризици, експертите предупредуваат и на економските последици. Привременото затворање на плажите директно влијае врз туризмот, кој претставува една од најважните стопански гранки во медитеранските земји.
Според Euronews, научниците предупредуваат дека климатските промени веќе не се закана за иднината, туку реалност која веќе сериозно влијае врз морските екосистеми и животот на милиони луѓе.
