Европа летото 2026 година се соочи со низа климатски екстреми – од историски ниски водостоји на големите реки до невообичаено топли мориња и интензивни шумски пожари.
Според податоците на Службата на Европската Унија за климатски промени „Коперник“, просечните летни водостоји на европските реки биле најниски откако во 1992 година започнале мерењата. Во јули и август, големи реки како Рајна, Дунав, Лоара и Сена имале рекордно ниски или речиси рекордно ниски протеци.
Ниските водостоји дополнително го отежнале наводнувањето, ладењето на нуклеарните реактори, производството на хидроенергија, достапноста на вода за пиење и снабдувањето со енергија. Од „Коперник“ посочуваат дека тоа ја покажува поврзаноста меѓу климатските промени и прашањата поврзани со енергетската безбедност.
Истовремено, долж голем дел од атлантскиот брег, како и во западниот и централниот дел на Средоземното Море, биле измерени рекордни или речиси рекордни температури на површината на морето. Високите температури биле проследени со силни до исклучително силни морски топлотни бранови.
Според „Коперник“, ваквите топлотни бранови можат дополнително да ја засилат жештината во крајбрежните подрачја, бидејќи го ограничуваат ноќното разладување и ја зголемуваат влажноста.
Летото 2026 година било трето најтопло досега измерено во Европа, а во западниот дел на континентот било најтопло досега. Просечната температура во Западна Европа достигнала 21,7 степени Целзиусови, што е 2,5 степени над просекот за периодот од 1991 до 2020 година.
До крајот на летото, 52 отсто од површината на Европа биле изложени на „многу силен“ топлински стрес, при кој температурата се чувствува како 38 степени Целзиусови или повеќе. Во текот на 17 дена, температури над 30 степени биле регистрирани на најмалку 60 отсто од територијата на Западна Европа. За споредба, такви услови биле забележани 11 дена во 2003 година и седум дена во 2025 година.
Долготрајната суша и повторливите топлотни бранови придонеле и за исклучително интензивна сезона на шумски пожари. До 2 септември, опожарената површина во Европската Унија била речиси двојно поголема од просекот за периодот од 2006 до 2025 година, при што особено погодени биле Шпанија и Франција.
Пожарите предизвикале голема материјална штета, а милиони луѓе биле изложени на опасно загадување на воздухот, наведува „Коперник“.
