Директорот на американската Централна разузнавачка агенција, Џон Ратклиф, би можел да преземе значително поголема улога во американските преговори со Русија и Украина, објави „Фајненшл тајмс“, повикувајќи се на американски претставници запознаени со плановите.
Според информациите, се разгледува можноста за намалување на улогата на специјалниот пратеник Стив Виткоф и Џаред Кушнер, кои досега ги предводеа разговорите со Москва и Киев. Целта на евентуалната промена е да се придвижат од мртва точка дипломатските напори за завршување на војната.
Од луѓе блиски до Ратклиф било пренесено до европски претставници дека директорот на американската Централна разузнавачка агенција би презел водечка улога во посредувањето меѓу Русија и Украина, додека би ги задржал и директните контакти со разузнавачките служби на двете земји.
Од агенцијата одбиле да ги коментираат информациите, а изворите наведуваат дека американскиот претседател Доналд Трамп сè уште нема донесено конечна одлука.
Белата куќа, пак, остро ги демантираше наводите. Оттаму порачаа дека „целата приказна е целосна лага“ и дека Виткоф и Кушнер продолжуваат да работат на мировен договор, со целосна доверба од Трамп.
Зад кулисите, според извори на „Фајненшл тајмс“, постои несогласување околу тоа кој треба да има главен збор во преговорите. Виткоф, кој е близок со Трамп, би можел да остане специјален пратеник за мировните мисии и паралелно да биде вклучен и во разговорите за Украина.
Ратклиф кон крајот на август ненајавено отпатувал во Москва, каде што разговарал со високи руски разузнавачки претставници за војната во Украина и конфликтот во Иран, како и за руските хибридни закани кон Европа.
Според „Фајненшл тајмс“, рускиот претседател Владимир Путин првично планирал средба со Ратклиф, но таа не се одржала. Портпаролот на Кремљ, Дмитриј Песков, изјавил дека таква средба воопшто не била планирана.
Во меѓувреме, Кушнер на свои блиски наводно им кажал дека планира да се повлече од преговорите за Украина и поголем дел од своето внимание да го насочи кон дипломатијата поврзана со војната во Газа и конфликтот меѓу САД, Израел и Иран.
Украински претставници велат дека Киев има коректни односи и со Ратклиф и со Виткоф и Кушнер. „Нам ни одговара Ратклиф, а добри ни се и Џаред и Стив. Проблемот не се тие, проблемот се Русите“, изјавил еден од украинските функционери.
