Во заедничка акција на црногорската полиција и американското ФБИ, во Котор е уапсен 39-годишниот Амир Барати, припадник на Иранската револуционерна гарда, кој американските власти го товарат за серија сајбер напади со кои, според обвинението, е предизвикана штета од околу 3,4 милијарди долари.
Од црногорската полиција информираа дека Барати се сомничи за повеќе кривични дела, меѓу кои заговор за компјутерска измама, неовластено навлегување во компјутерски системи и кражба на идентитет.
Според наводите, тој од 2013 година дејствувал како соработник на иранска компанија и бил вклучен во обемни хакерски активности насочени кон американската инфраструктура. Меѓу целите на нападите биле повеќе од 150 универзитети во Соединетите Американски Држави.
Во соопштението се посочува дека незаконски прибавените податоци, како и пристапот до компромитираните универзитетски профили, биле користени од Иранската револуционерна гарда, но и од други субјекти и институции во Иран, вклучително и тамошни универзитети.
Американските власти го бараат Барати во рамки на истрага за сајбер криминал, а се очекува во следниот период да биде донесена одлука за понатамошната постапка.
