„Фемили Аеродром“ ги обвини медиумите за хајка: Демантираат употреба на ножеви и палки во тепачката со градските ривали

Навивачката група „Фемили Аеродром“, која го поддржува КК МЗТ Скопје, реагираше на медиумските написи по тепачката меѓу навивачите на МЗТ и на КК Работнички, што се случи минатиот викенд.

— реклама —

Во соопштение објавено на социјалните мрежи, од „Фемили Аеродром“ ги обвинија дел од медиумите за, како што велат, медиумска хајка, сензационализам и пласирање непотврдени информации за инцидентот.

— реклама —

— реклама —

Особено ги демантираат тврдењата за наводна употреба на ножеви, палки и друго ладно оружје во пресметката со навивачите на градскиот ривал. Од групата бараат оние што изнесуваат вакви сериозни обвинувања да понудат конкретни и проверливи докази, наместо да се повикуваат на неименувани извори и непотврдени информации.

— реклама —

„Кој ви даде право да осудувате луѓе преку наслов пред воопшто да се утврдат фактите?**

Кога станува збор за Фемили, очигледно е дека за одредени медиуми вистината е споредна работа. Доволно е да се спомене нашето име за да започне фабрикување на наслови, драматизирање на настани и создавање слика во јавноста која потоа директно се пренесува врз голем број поединци, нивните семејства, нивните работни места и нивниот секојдневен живот.

За што? За еден клик повеќе? За некој преглед и коментар екстра? За повисок рејтинг на вашите т.н. портали?

Ако цената на вашиот рејтинг е уништување на нечиј углед, тогаш проблемот не е во навивачите, туку во професионалниот и моралниот интегритет на оние што се претставуваат како новинари.

Нема да дозволиме поединци да бидат јавно етикетирани, осудувани и изложувани на медиумски линч врз основа на непотврдени информации. Секој има право на фер третман, на презумпција на невиност и на вистинито информирање.

Фемили Аеродром не бара привилегии. Бараме само она што секому му следува – вистина, факти и одговорност за јавно изнесениот збор.

И да биде кристално јасно: нашето молчење не е слабост, а нашата моментална воздржаност не значи дека ќе дозволиме некој да гази врз достоинството на нашите членови.

На сите наши членови кои деновиве се најдоа на удар на јавниот линч им порачуваме дека не се сами. Поддршката допрва ќе се почувствува. Ќе стоиме зад секој наш член кој е неправедно изложен на притисок, стигматизација или дискриминација. Ќе ги искористиме сите легални и институционални механизми за заштита на нивните права и достоинство.

А до медиумите кои одлучија да ја заменат вистината со сензација имаме само една порака: Не сте над фактите, не сте над одговорноста и сигурно не сте над правото на луѓето да се бранат од вашите конструкции.

Фемили Аеродром е многу повеќе од наслов во вашите портали. Тоа се луѓе, пријателства, припадност и заедништво кое не се создава ниту се уништува со неколку сензационалистички текстови.“, наведуваат од „Фемили Аеродром“.