ФИФА ја казни Шпанија поради исламофобични извици на натпреварот со Египет

ФИФА ја казни Фудбалската федерација на Шпанија поради дискриминаторски навреди од навивачите за време на пријателскиот натпревар меѓу Шпанија и Египет. Дел од домашните навивачи упатувале провокации кон гостите со извици „кој не скока, тој е муслиман“, поради што дисциплинската комисија на ФИФА изрече парична казна и ограничување на капацитетот на стадионот за следниот натпревар на шпанската репрезентација.

— реклама —

Според одлуката, капацитетот на стадионот за следниот натпревар на Шпанија треба да биде намален за 15 проценти, а федерацијата ќе плати и 18.000 евра.

Натпреварот се одиграл на стадионот „Корнеља-Ел Прат“ во Барселона на 31 март, како дел од подготовките на двете репрезентации за Светското првенство во САД, Канада и Мексико.

— реклама —

ФИФА ја известила Шпанската фудбалска федерација дека дел од местата што ќе бидат затворени, односно 15 проценти од капацитетот, сепак ќе може да се пополнат со навивачи од одредени општествени групи.

— реклама —

„Кралската шпанска фудбалска федерација се прогласува за одговорна за дискриминаторското однесување на своите навивачи на пријателскиот натпревар меѓу Шпанија и Египет, одигран на 31 март 2026 година“, се наведува во соопштението на ФИФА.

Од Шпанската фудбалска федерација најавија дека ќе поднесат жалба до Судот за спортска арбитража (КАС), тврдејќи дека реагирале веднаш и ефикасно штом биле известени за инцидентот.

Од Федерацијата наведуваат дека несоодветното однесување на дел од навивачите било откриено преку нивните сопствени механизми за следење. Според нив, судиската екипа веднаш била известена, а безбедноста во тој дел од стадионот била засилена.