Министерот за здравство, Венко Филипче информираше дека бранот на новозаболени лица со коронавирус во последниве 24 часа е во опаѓање. Како што кажа тој, здравствените власти и натаму се претпазливи бидејќи на голем број од новозаболените би можело да им затреба болничко лекување. Министерот соопшти дека бројот на новодијагностицирани случаи во последново деноноќие е под 900.
„Се надевам дека овој тренд ќе продолжи и дефинитивно ова се знаци дека и овој бран стивнува“, рече Филипче.
Филипче додаде дека на 19 април ќе пристигнат 10 илјади вакцини на Pfizer, на 26 април ќе пристигнат уште 10 илјади дози, а на 28 април се очекува да пристигнат и кинеските вакцини. Според министерот се очекува да пристигнат вкупно 200.000 вакцини.
Министерот додаде дека дневно се вакцинираат по 1.500 граѓани, а откако ќе стигнат дополнителни вакцини, бројот на дневно ниво ќе се зголеми.
„Нас во овој момент не ни треба нарачка не ни требаат дополнителни вакцини. Засега имаме нарачано 2,6 милиони вакцини“, изјави Филипче.
фото: Архива
