Претседателот на СДСМ, Венко Филипче, му возврати на премиерот Христијан Мицкоски, откако лидерот на ВМРО-ДПМНЕ изјави дека неговата партија е „промакедонска“.
Филипче преку кратка порака го нападна Мицкоски, алудирајќи на бугарските пасоши на функционери и членови на ВМРО-ДПМНЕ.
„Промакедонска? Значи не сте македонска? А да, не сте. Не може македонска со бугарски пасоши!“, напиша Филипче.
Претходно, Мицкоски одговарајќи на новинарско прашање за тоа што Филипче ја нарекол ВМРО-ДПМНЕ „бугарофилска партија“, рече дека раководството на СДСМ секојдневно излегува со „некултурни“ изјави и ги менува ставовите.
„Човекот секој ден кажува, а и раководството, работи кои се некултурни, а второ тоа што го кажуваат го менуваат неколкукратно во денот“, рече Мицкоски.
Тој додаде дека ВМРО-ДПМНЕ е „промакедонска партија“ и дека, според него, СДСМ го изгубил својот идентитет.
„Ние сме промакедонска партија и тоа нас нѐ интересира. Тоа што тие го изгубија својот идентитет е нивен проблем, а со тоа и на избори ќе се соочат“, изјави Мицкоски.
