Претседателот на СДСМ, Венко Филипче, на денешната собраниска седница за пратенички прашања побара од премиерот Христијан Мицкоски да одговори кој ќе сноси одговорност за, како што рече, загадената вода за пиење во повеќе делови од државата.
Филипче оцени дека станува збор за сериозен проблем што директно го засега јавното здравје и ја обвини Владата за недоволна транспарентност и недостиг на информации кон граѓаните.
„Водата е загадена во пола држава – во Гостивар, Валандово, Скопје и во повеќе други општини, а јавноста сè уште нема одговор на клучните прашања. Кој е одговорен, кој ги вршел контролите и зошто резултатите не биле навремено објавувани?“, праша Филипче.
Тој се осврна и на случајот со водата во болницата во Лешок, посочувајќи дека примерок земен од чешма во здравствената установа покажал загадување, поради што побара институциите да ги објават најновите анализи и да ја информираат јавноста за актуелната состојба.
Филипче реагираше и на различните изјави на претставници на Владата во врска со квалитетот на водата во Гостивар, оценувајќи дека таквите пораки создаваат несигурност кај граѓаните.
Во своето излагање тој го отвори и прашањето за појавата на бела пена во реката Лепенец, во близина на бунарите што го дополнуваат изворот Рашче, од каде што се снабдува со вода за пиење дел од Скопје. Според него, јавноста не добила доволно информации за овој случај.
Филипче истакна дека за вакви прашања треба да се изјаснуваат стручни лица и предупреди дека третманот на водата мора да се спроведува согласно професионални и здравствени стандарди.
