Претседателот на СДСМ, Венко Филипче, на денешната седница за пратенички прашања побара од премиерот Христијан Мицкоски да објасни зошто Владата, како што рече, не ги објавува резултатите од анализите за квалитетот на водата во повеќе општини и зошто граѓаните не добиваат навремени и јасни информации за состојбата.
Филипче истакна дека во повеќе градови, меѓу кои Гостивар, Валандово и Скопје, се појавиле проблеми со водата за пиење и праша кој е одговорен за контролите и зошто резултатите од анализите не биле навремено соопштени на јавноста. Тој потсети и на случајот со загадената вода во болницата во Лешок, нагласувајќи дека сè уште нема информации за актуелната состојба.
Според него, дополнителна забуна создаваат различните изјави на претставници на Владата за исправноста на водата во Гостивар, поради што, како што рече, граѓаните не знаат кому да веруваат.
Филипче се осврна и на случајот со белата пена во реката Лепенец, во близина на бунарите што го дополнуваат изворот Рашче, оценувајќи дека јавноста и за овој случај останала без доволно информации.
Тој ја критикуваше и комуникацијата на институциите, наведувајќи дека за прашања поврзани со безбедноста на водата треба да се изјаснуваат стручни лица со соодветна експертиза. Според Филипче, при третманот на водата најнапред треба да се отстранат органските соединенија, а потоа да се спроведе процесот на хлорирање.
