Лидерот на СДСМ, Венко Филипче, денеска на прес-конференција го обвини премиерот и лидер на ВМРО-ДПМНЕ, Христијан Мицкоски, дека лаже кога тврди дека македонскиот јазик е загрозен.
Филипче изјави дека македонскиот јазик е јасно признаен во Европската Унија и дека тоа е наведено во преговарачката рамка.
„Премиерот го спомнува идентитетот, јазикот и така натаму, а тоа е само уште една тема на којашто гледаме дека човекот е лажго. Премиерот лаже“, рече Филипче.
Тој потсети дека Мицкоски претходно тврдеше дека Македонија нема да добие датум за преговори со владата на Зоран Заев, а потоа, според него, лажно зборувал и за Преспанскиот договор и за наводна загрозеност на македонскиот јазик.
„Во Францускиот предлог, односно во Преговарачката рамка, јасно стои македонски јазик. Не стои ниту со фуснота, ниту како што е цитиран во Уставот. Стои чист македонски јазик“, нагласи Филипче.
Тој додаде дека граѓаните треба да ја знаат вистината и оцени дека премиерот се претставува како голем патриот, додека, според него, манипулира со темата за идентитетот и јазикот.
