Пратеникот на ВМРО-ДПМНЕ, Бране Петрушевски, денеска на прес-конференцијата обвини дека лидерот на СДСМ, Венко Филипче, не реагирал на, како што посочи, дипломатскиот скандал поврзан со објавувањето на доверлива дипломатска комуникација од страна на Бугарија.
Според Петрушевски, јавно објавениот документ содржел чувствителни информации поврзани со безбедноста на премиерот Христијан Мицкоски и неговото семејство, меѓу кои и детали за службените возила, лицата кои патувале, местото на престој и комуникациските фреквенции што ги користело обезбедувањето.
„Објавувањето на доверлива дипломатска комуникација претставува сериозен преседан и неодговорен чин што отвора прашања и за безбедноста на претседателот на Владата и неговото семејство. Наместо извинување и преземање одговорност од официјална Софија, јавноста доби молк“, изјави Петрушевски.
Тој упати критики и кон лидерот на СДСМ, оценувајќи дека Филипче не ја осудил постапката на бугарските власти.
„Филипче повторно покажува дека кога станува збор за потезите на бугарските власти, секогаш избира да молчи. Не реагира ниту кога се негира македонскиот идентитет, јазик и историја, ниту кога со дипломатски преседан се доведува во прашање безбедноста на претседателот на Владата“, рече Петрушевски.
Од ВМРО-ДПМНЕ оценуваат дека државата треба да настапува со единствен и достоинствен став во однос на националните прашања и предизвиците на евроинтегративниот пат.
Петрушевски порача дека Македонија ќе продолжи да ги брани своите национални интереси и нема да отстапи пред, како што наведе, надворешните притисоци.
