Филипче му честиташе на Маѓар: Слободна Унгарија дава надеж за слободна Македонија!

Претседателот на Социјалдемократскиот сојуз на Македонија, Венко Филипче, му упати честитка на новоизбраниот унгарски премиер Петер Маѓар, кој денеска положи заклетва и официјално ја презеде функцијата, ставајќи крај на повеќедецениското владеење на Виктор Орбан.

Филипче оцени дека Унгарија добива нова демократска влада, нагласувајќи дека со тоа завршува, како што наведе, период на корупција, авторитарно владеење и ограничување на слободите.

— реклама —

Во својата порака, тој истакна дека иако неговата политичка партија не споделува иста идеологија со политичкото движење на Маѓар, ги обединува борбата за демократија и против авторитарни режими.

— реклама —

Филипче порача дека политичките промени во Унгарија претставуваат инспирација и за Северна Македонија, наведувајќи дека и во земјата постои борба против корумпиран и авторитарен модел на владеење. Според него, заедничка вредност е верувањето дека никој не смее да биде над законот и дека институциите мора да работат во интерес на граѓаните.

— реклама —

Тој изрази надеж дека и Македонија ќе доживее период на политичка промена, во кој, како што рече, ќе има одговорност за злоупотребите на власта и за корупцијата.

— реклама —

Во пораката, Филипче нагласи дека неговата визија е општество со слободни медиуми, слобода на говор, почитување на човековите права и европски вредности, додавајќи дека вистината мора да надвладее над пропагандата и дезинформациите.

На крајот, тој му посака успех на новиот унгарски премиер и порача дека се надева на подобри односи и соработка меѓу двете држави, завршувајќи со порака за „слободна Унгарија и слободна Македонија“ и „да живее Европа“.