Претседателот на СДСМ, Венко Филипче, денеска на прес-конференција порача дека нема да има средба со лидерот на ВМРО-ДПМНЕ и дека техничката влада мора да продолжи да функционира, обвинувајќи ја власта за обид за бегство од одговорност преку предвремени избори.
Филипче оцени дека повиците за разговори за техничка влада се алиби за распишување предвремени парламентарни избори и дека, според него, сценариото е однапред подготвено. Тој тврди дека актуелната власт е во финансиски теснец и дека се обидува да отвори простор за нови задолжувања, поврзани со планови за прифаќање мигранти, за што, како што рече, веќе пишувале и британски медиуми.
„Нема пари во буџетот, а власта брза да создаде услови за нови кредити и договори. СДСМ нема да биде покритие за такво сценарио“, изјави Филипче, додавајќи дека ВМРО-ДПМНЕ и, како што ја нарече, „тендер коалицијата ВМРО–ЗНАМ“, можат сами да си ги распишат изборите.
Според него, зад инсистирањето за укинување или промена на техничката влада стои, како што рече, обид за целосна узурпација на институциите. Филипче ја обвини власта дека воспоставила контрола врз правосудството и обвинителството, дека донела измени на Кривичниот законик спротивни на препораките на Европската Унија, како и законски решенија со кои, според него, се ограничува слободата на говор и се врши партизација на полицијата.
Тој најави дека во текот на утрешниот ден ќе организира брифинг на кој, како што рече, детално ќе ги образложи предлог-законите и состојбите во правосудството. Според Филипче, доколку не биле овие чекори на власта, можело да се разговара, но актуелната ситуација ја оцени како „класичен мафијашки модел“.
Филипче упати и сериозни обвинувања за надворешно политичко влијание, посочувајќи дека изјавите и потезите на власта се временски поврзани со случувањата во Србија. Тој повтори дека СДСМ подолго време предупредувал на ваков развој на настаните.
Во обраќањето беше спомната и улогата наСАД, како и Законот за Западен Балкан, за кој Филипче оцени дека ја забрзал динамиката околу борбата против корупцијата и криминалот. Тој рече дека постојат најави за санкции и „црни листи“ за политичари од регионот, кои би можеле да бидат објавени во наредниот период.
На крајот, Филипче порача дека СДСМ нема да учествува во никакви разговори за техничката влада и дека, според него, со луѓе кои се обидуваат да ја избегнат одговорноста нема политички дијалог, туку само институционална одговорност.
