ЛИДЕРСКА СРЕДБА

Ние сме спремни да настапиме на избори, кога и да се случат, а ќе има предвремени, вели Филипче

Лидерот на СДСМ, Венко Филипче, изјави дека неговата партија нема намера да прави политички договори со власта, нагласувајќи дека единствениот договор што СДСМ го признава е оној со граѓаните. Изјавата ја даде на прес-конференција, одржана по лидерската средба на која СДСМ одлучи да не учествува.„СДСМ е спремна за избори, годинава, следната, па и во редовни избори. Јас сум сигурен, а со оглед на тоа што се случува, дека избори предвремени ќе има. Дали годинава, пролет, есен, на крајот од годината“, рече Филипче.Тој рече дека ВМРО-ДПМНЕ и ДУИ се во коалиција.„Ние договор можеме да правиме единствено со граѓаните. Наша обврска е да ја вратиме власта кај граѓаните. ВМРО-ДПМНЕ и ДУИ нека се договараат меѓу себе“, рече Филипче, образложувајќи ја одлуката на партијата да не биде дел од средбата свикана од премиерот.Тој изнесе серија обвинувања кон актуелната власт, наведувајќи дека наместо реформи се спроведуваат политики кои, според него, ја оддалечуваат државата од Европската Унија. Филипче посочи на, како што рече, сомнителни тендери, запирање на европската агенда и сè поизразено приближување кон Русија.„Еден закон беше донесен непосредно пред Нова година и тоа не може да се нарече реформска агенда“, оцени лидерот на СДСМ, додавајќи дека институциите се повторно целосно партизирани, на начин кој потсетува на периодот на владеењето на Никола Груевски.Според Филипче, се злоупотребува полицијата, а под сомнеж е и користењето на ИПАРД фондовите, што, како што истакна, претставува сериозен удар врз владеењето на правото и европските стандарди. Тој јасно порача дека СДСМ се спротивставува на укинувањето на таканаречената пржинска влада, оценувајќи дека во услови на нарушена демократија таа сè уште има своја улога.

Македонија | пред 2 седмици

(Видео) Заклучоци од лидерската средба: „Техничката влада треба да замине во минатото, но укинувањето нема да важи за следните избори“

Лидерската средба што се одржа денеска отвори простор за приближување на ставовите по повеќе клучни политички прашања, оцени премиерот Христијан Мицкоски, нагласувајќи дека фокусот бил ставен на решенија, а не на меѓупартиски конфликти.Според него, за значаен дел од темите постоело усогласување меѓу присутните, а таму каде што имало разлики, биле понудени конкретни идеи како дебатата да продолжи на институционално ниво. Како следен чекор, договорено е дел од отворените прашања да се разгледуваат во Собранието, преку координаторите на пратеничките групи.На средбата, како што информираше, била искажана заедничка подготвеност техничката влада да се напушти како модел. Сепак, поради отсуството на СДСМ, предложено било укинувањето да не се применува на претстојните избори, туку да важи за некои од наредните изборни циклуси, со што би се избегнале наметнати решенија.Денеска видовте дека една коалиција отсуствуваше. Мојот предлог беше да не го правиме укинувањето на техничката влада насила без нивна согласност, туку да донесеме измени со кои нема да се опфатат следните избори, туку некои следни кои ќе следат потоа. Некои измени треба да се направат затоа што сега има поделби на ресори како што се, на пример, во Министерството за администрација и Министерството за труд и за економија. Треба да се допрецизира каде овие заминик министри ќе бидат номинирани. Сме подготвени ако веќе нема согласност кај сите да се избрише техничката влада, барем тоа да се направи за изборите потоа – рече Мицкоски.Премиерот ја оцени средбата како позитивен сигнал за политичка зрелост, нагласувајќи дека ваквиот пристап – со отворена дебата и фокус на решенија – треба да стане практика и во иднина.

Македонија | пред 2 седмици

Апасиев: Немаме проблем да ја укинеме Пржинската влада, нас ни е сеедно кои се на власт, ние секако го ,,јадеме стапот”

Лидерот на Левицата, Димитар Апасиев, пред почетокот на лидерската средба изјави дека очекува конструктивен дијалог.„Левицата е првпат поканета да учествува на лидерска средба. Ова ги задоволува нашите претходни барања, дека ние ќе учествуваме на лидерска средба само ако е во рамки на институциите, а не во хотели во Маврово, во европски или американски амбасади. Нашите барања веќе ги кажавме - промена на Изборниот законик неминовно за следните избори зашто Левица е единствената досега цензурирана партија во овие 35 години плурализам. Бидејќи првпат доаѓаме, не очекуваме ништо, знаејќи го досегашниот лицемерен однос на властодршците од ДПМНЕ, но секогаш има прва шанса, па така ние како веќе опозициска профилирана партија која единствена е во раст во минатите локални избори, очекуваме дека ќе има конструктивен дијалог и дека наредните месеци ќе се променат законите што ние ги бараме”, изјави пред почетокот на средбата Апасиев.За Левица нема проблем да се укине Пржинската влада.„Сметаме дека тоа е бирократски остаток од едно време кога Македонија беше третирана како протекторат и оттука ни е сеедно дали се ДПМНЕ или СДСМ на власт. Ние секако го јадеме стапот па не ни е неприфатливо да ја укинеме Пржинската влада и по тоа прашање немаме никакви дилеми, но за другите прашања ќе инсистираме комплетно да се прифатат нашите барања особено при шпекулациите дека ќе се распишуваат предвремени избори. Доколку се распишат со овој Изборен законик ние повторно ќе бидеме цензурирани и оттука е нашиот интерес да присуствуваме на оваа средба”, рече Апасиев.

Македонија | пред 2 седмици

Петорка на заедничка маса без Филипче и Зајкова, Минчев, наместо Димитриевски и Касами без Меџити

Во Клубот на пратениците започна лидерската средба што ја бараше премиерот и претседател на ВМРО-ДПМНЕ, Христијан Мицкоски. Мицкоски е придружуван од координаторот на пратеничката група на ВМРО-ДПНМНЕ Никола Мицевски.Во клубот на заедничка маса седнаа: наместо лидерот на ЗНАМ тука е генералниот секретар на ЗНАМ и министер за јавна администрација Горан Минчев, градоначалникот на Тетово, Биљал Касами од коалицијата ВРЕДИ, но го нема градоначалникот на Чаир и претседател на Демократското движење, Изет Меџити.Од опозициските пратенички групи присутни се лидерите на Левица и на ДУИ, Димитар Апасиев и Али Ахмети.Своето остуство јасно го најави лидерот на СДСМ Венко Филипе, со став дека тие што ќе дојдат на средбата ја легитимираат корупцијата, но по нејасните ставови отсустува и лидерката на ЛДП, партија која немаше негативен став кон иницијативата на Мицкоски. Но изгледа чашата се прели по вчерашната кавга на Зајкова со ВМРО-ДПМНЕ за измените на Кривичниот законик.На средбата не дојде претставник на двете крила на Алијансата за Албанците, иако не се знае дали добиле покана.Али Ахмети дојде на лидерската со свои барања:Бадентер за избор на Влада и во Уставен суд, уставните измени Македонија да излезе од ќор-сокакот кон ЕУ, Апасиев пак бара Македонија да биде една изборна единица и еднаков третман при медиумското претставување.

Македонија | пред 2 седмици

Лидерска средба: На маса со премиерот Христијан Мицкоски седнаа лидерите на ДУИ и Левица, Филипче не дојде

Во тек е лидерската средба во Клубот на пратениците, но без учество на опозициската СДСМ. На маса со премиерот Христијан Мицкоски седнаа претставници на владејачкиот блок, како и лидерите на ДУИ и Левица.Од партијата на Венко Филипче уште претходно ставија до знаење дека нема да присуствуваат на состанок чија главна тема е укинувањето на техничката влада. Филипче јавно порача дека не гледа легитимна основа за вакви разговори и дека иницијативата ја оценува како политички притисок во пресрет на можни избори.Дополнително, од СДСМ денеска повторија дека техничката влада е неопходен механизам за контрола на извршната власт, особено во чувствителни периоди. Според нив, укинувањето би значело исклучување на опозицијата од институционален увид и надзор.Владејачката ВМРО-ДПМНЕ, пак, инсистира дека моделот на техничка влада е застарен и воведен во време на длабока политичка криза, која, според нив, одамна е надмината. Од партијата порачуваат дека државата има потреба од стабилен систем, а не од привремени решенија.На средбата, која сè уште е во тек, се отвораат и други прашања – од реформите во правосудството и изборната регулатива, до изборот на народен правобранител и идниот институционален распоред.

Македонија | пред 2 седмици

Во Клубот на пратениците се собираат лидерите на партиите: СДСМ со реакција - сите што ќе одат на средба со Мицкоски го легитимираат криминалот и корупцијата

СДСМ остро реагираше на најавената лидерска средба за укинување на техничката влада, која треба да се одржи денеска, оценувајќи дека секој што ќе учествува на средба со Христијан Мицкоски директно го легитимира криминалот и корупцијата на актуелната власт.Во соопштението, Социјалдемократски сојуз на Македонија наведува дека сите политички субјекти кои ќе седнат на маса со Мицкоски за укинување на техничката влада стануваат соучесници во, како што се наведува, „легитимирањето на криминалот и корупцијата на тендер коалицијата ВМРО-ЗНАМ“, во анти-ЕУ кампања за изолација на земјата, како и во планот за предвремени избори без основни услови тие да бидат фер и демократски.Од СДСМ дополнително предупредуваат дека, според нив, по ваквите чекори следи и реализација на планот „мигранти за пари“, за кој тврдат дека е дел од поширока стратегија на власта.„Секој што ќе отиде на средбата со Мицкоски не може подоцна да тврди дека не бил соучесник“, се наведува во партиското соопштение, во кое се додава дека сите чекори што досега ги презела власта – изолација, избори и мигранти за пари – биле однапред најавени од опозицијата.Инаку, денеска ќе се одржи најавената лидерска средба на која треба да се разговара за можноста за укинување на техничката влада, тема која предизвика остри политички реакции и поделби меѓу партиите.СДСМ порачува дека останува „со граѓаните, на вистинската страна“, нагласувајќи дека ќе продолжи да се залага за европска интеграција, правда и борба против корупцијата и криминалот.

Македонија | пред 2 седмици

Мицкоски ги собира лидерите: техничката влада, реформските закони и изборните правила на маса

Укинувањето на техничката влада, реформите во правосудството и изборните правила ќе бидат во фокусот на лидерската средба што утре ќе се одржи во Клубот на пратениците, на иницијатива на премиерот и лидер на ВМРО-ДПМНЕ, Христијан Мицкоски.На средбата се поканети лидерите на парламентарните партии кои имаат пратенички групи, а покрај укинувањето на техничката влада, најавено е отворање на разговори и за Изборниот законик, изборот на народен правобранител, како и пакетот реформски закони од областа на правосудството. Дневниот ред, според најавите, може да биде дополнет и со други теми предложени од учесниците.Од опозициските партии, засега учество потврди само Левицата, додека лидерот на СДСМ, Венко Филипче, уште на старт го одби повикот за лидерска средба, обвинувајќи дека власта бара оправдување за предвремени избори.Од владејачката коалиција, на состанокот се очекува претседателот на ЗНАМ и градоначалник на Куманово, Максим Димитриевски, како и претставник од коалицијата „Вреди“, градоначалникот на Тетово, Биљал Касами. Коалицијата „Вреди“ најави дека ќе присуствува со својот лидер Касами и координаторот на пратеничката група, Беким Ќоку.ДУИ допрва треба да донесе одлука дали нејзиниот лидер Али Ахмети ќе учествува на средбата, по денешната седница на Генералниот совет на партијата, на која се разгледуваат актуелните политички состојби и внатрепартиски прашања.Левицата најави дека ќе ја поддржи идејата за укинување на техничката влада, но само доколку се воведе една изборна единица. Пратеникот Амар Мециновиќ оцени дека е време да се отвори конструктивен дијалог за клучните државни прашања.Поддршка за лидерската средба изразија и ЛДП и ДОМ. Од ЛДП порачаа дека се подготвени за разговор, но не само за техничката влада, туку и за суштинските проблеми кои директно го засегаат животот на граѓаните. ДОМ, пак, повика на поширока агенда што би опфатила една изборна единица и отворени листи без изборен праг.Премиерот Мицкоски најави дека средбата треба да се одржи пред неговото заминување на Светскиот економски форум во Давос и порача дека уставни и системски промени, како укинувањето на техничката влада, не треба да се носат без широк политички консензус.Откако СДСМ го одби учеството, Мицкоски оцени дека очекувал поголема политичка зрелост и нагласи дека власта има доволно пратеници за укинување на техничката влада, но дека сакала процесот да биде инклузивен и да се отвори поширока дебата за клучните закони и европските реформи.

Македонија | пред 3 седмици

Лидерска средба на 14 јануари: Левица прифаќа, СДСМ одбива, ДУИ ќе одлучува

Пратеникот Амар Мециновиќ денеска соопшти дека Левица ќе учествува на најавената меѓупартиска лидерска средба што ја иницираше премиерот Христијан Мицкоски.На прес-конференција, Мециновиќ истакна дека партијата, како парламентарен субјект, подолг период настојува да воспостави комуникација со парламентарното мнозинство преку законски предлози и барање консензус за клучни државни прашања, оценувајќи дека сега е моментот за влез во суштински и конструктивен дијалог. Според него, приоритет за Левица е создавање демократска и фер атмосфера за време на изборниот процес, а во таа насока ќе бидат насочени и нивните барања.Иницијативата за лидерска средба доаѓа од премиерот Мицкоски, кој најави отворање разговори за укинување на т.н. „Пржинска влада“, модел воведен пред десет години, како и за други системски прашања. Од владината служба за односи со јавноста претходно информираа дека поканите се во фаза на испраќање и ќе бидат доставени до сите партии со пратеничка група во Собрание на Република Македонија.Премиерот минатата седмица најави дека средбата е планирана за 14 јануари и треба да се одржи во Клубот на пратениците.Иницијативата, сепак, се соочува со различни реакции во политичкиот блок. СДСМ најави дека нема да учествува на средбата, при што партискиот лидер Венко Филипче изјави дека „средба со криминалци нема да има“. Од ДУИ соопштија дека својот став ќе го соопштат откако официјално ќе ја добијат поканата.Левица, пак, повтори дека се залага за укинување на техничката влада, но под услов тоа да биде проследено со реални, а не само декларативни демократски реформи, како и со воведување на една изборна единица, што, според партијата, би обезбедило пофер и порепрезентативен изборен систем.

Македонија | пред 3 седмици

ВМРО-ДПМНЕ со обвинувања кон Филипче: „Одбива дијалог и реформи за ЕУ“

Владејачката партија ВМРО-ДПМНЕ денеска реагираше на изјавите на лидерот на СДСМ, Венко Филипче, обвинувајќи го дека одбива дијалог и учество на лидерска средба посветена на прашања од државен интерес, меѓу кои и реформските закони поврзани со европската интеграција.Од ВМРО-ДПМНЕ оценуваат дека со одбивањето на средбата, Филипче покажал дека нема интерес за постигнување политички консензус за реформите кои, како што наведуваат, се дел од агендата за унапредување на економскиот раст, стабилноста и напредокот на државата кон Европската Унија.Партијата посочува дека иако СДСМ јавно се залага за европска интеграција, ваквиот потег, според нив, го доведува во прашање вистинскиот ангажман за реформските процеси, особено во областа на правосудството, безбедноста и слободата на изразување.Во соопштението, ВМРО-ДПМНЕ се осврнува и на денешниот брифинг на Филипче со новинарите, наведувајќи дека тој упатил критики кон дел од медиумите, што партијата го толкува како негативен однос кон слободата на говорот и јавната дебата.Дополнително, од партијата повторно ги актуелизираа обвинувањата поврзани со поранешни случаи од периодот кога Филипче беше министер за здравство, вклучително и трагедијата со модуларната болница во Тетово, како и други наводи поврзани со јавни набавки и тендерски постапки. За овие обвинувања, Филипче и СДСМ и во минатото имаа деманти и свои ставови.Во реакцијата се споменува и критиката на Филипче кон системот „Сејф сити“, за кој ВМРО-ДПМНЕ наведува дека е важен алат за зголемување на безбедноста во сообраќајот и идентификација на прекршителите.Од ВМРО-ДПМНЕ порачуваат дека на државата ѝ е потребна, како што велат, конструктивна и одговорна опозиција, а не политичко дејствување мотивирано исклучиво од партиски интереси.

Македонија | пред 3 седмици

Филипче: Нема лидерска средба со Мицкоски, техничката влада мора да остане

Претседателот на СДСМ, Венко Филипче, денеска на прес-конференција порача дека нема да има средба со лидерот на ВМРО-ДПМНЕ и дека техничката влада мора да продолжи да функционира, обвинувајќи ја власта за обид за бегство од одговорност преку предвремени избори.Филипче оцени дека повиците за разговори за техничка влада се алиби за распишување предвремени парламентарни избори и дека, според него, сценариото е однапред подготвено. Тој тврди дека актуелната власт е во финансиски теснец и дека се обидува да отвори простор за нови задолжувања, поврзани со планови за прифаќање мигранти, за што, како што рече, веќе пишувале и британски медиуми.„Нема пари во буџетот, а власта брза да создаде услови за нови кредити и договори. СДСМ нема да биде покритие за такво сценарио“, изјави Филипче, додавајќи дека ВМРО-ДПМНЕ и, како што ја нарече, „тендер коалицијата ВМРО–ЗНАМ“, можат сами да си ги распишат изборите.Според него, зад инсистирањето за укинување или промена на техничката влада стои, како што рече, обид за целосна узурпација на институциите. Филипче ја обвини власта дека воспоставила контрола врз правосудството и обвинителството, дека донела измени на Кривичниот законик спротивни на препораките на Европската Унија, како и законски решенија со кои, според него, се ограничува слободата на говор и се врши партизација на полицијата.Тој најави дека во текот на утрешниот ден ќе организира брифинг на кој, како што рече, детално ќе ги образложи предлог-законите и состојбите во правосудството. Според Филипче, доколку не биле овие чекори на власта, можело да се разговара, но актуелната ситуација ја оцени како „класичен мафијашки модел“.Филипче упати и сериозни обвинувања за надворешно политичко влијание, посочувајќи дека изјавите и потезите на власта се временски поврзани со случувањата во Србија. Тој повтори дека СДСМ подолго време предупредувал на ваков развој на настаните.Во обраќањето беше спомната и улогата наСАД, како и Законот за Западен Балкан, за кој Филипче оцени дека ја забрзал динамиката околу борбата против корупцијата и криминалот. Тој рече дека постојат најави за санкции и „црни листи“ за политичари од регионот, кои би можеле да бидат објавени во наредниот период.На крајот, Филипче порача дека СДСМ нема да учествува во никакви разговори за техничката влада и дека, според него, со луѓе кои се обидуваат да ја избегнат одговорноста нема политички дијалог, туку само институционална одговорност.

Македонија | пред 3 седмици

Мицкоски ќе бара лидерска средба за укинување на техничката влада

Премиерот Христијан Мицкоски најави дека денеска ќе упати покани до политичките партии за лидерска средба. Таа би се одржала во наредните седум до десет дена.Теми на средбата би биле консензус за реформските закони и укинување на техничката влада.На средбата би требало да се отвори и прашањето за избор на народен правобранител. По пензионирањето на Насер Зибери, не може да се избере негов наследник повеќе месеци, бидејќи Владата нема Бадентерово мнозинство.Тоj очекува сите лидери на парламентарните коалиции да ја прифатат поканата за лидерска ср

Македонија | пред 3 седмици