Претседателот на СДСМ, Венко Филипче, обвини дека Македонија повеќе не е дел од европската агенда и оцени дека Владата предводена од премиерот Христијан Мицкоски ја води државата кон политичка изолација.
Филипче посочи дека додека Европската Унија отвора нови кластери и затвора поглавја во преговорите со Украина, Молдавија, Црна Гора и Албанија, Македонија останува надвор од тие процеси. Според него, тоа е последица на, како што рече, неспособноста на Владата да изгради стратегија за евроинтеграција.
Тој оцени дека државата ризикува да остане последна во регионот, да ги изгуби европските финансиски можности и да биде изложена на засилено влијание од земји кои не се заинтересирани за нејзиното членство во Европската Унија.
Филипче ја критикуваше и економската политика на Владата, наведувајќи дека земјата се соочува со пад на странските инвестиции и индустриското производство, стагнација на платите и неизвесност за пензискиот систем, додека предложениот ребаланс на Буџетот го оцени како обид за прикривање на, како што рече, лошото финансиско управување.
Според лидерот на СДСМ, политичката изолација директно води кон економско назадување, а граѓаните, како што истакна, сè повеќе ги чувствуваат последиците преку намалениот животен стандард и неизвесноста за иднината.
