Филипче: И Црна Гора ѝ ја одзеде дозволата за работа на Alta Pay Group, само кај нас Мицкоски и Славески убедуваат дека сè е во ред

По Србија, и Црна Гора ѝ ја одзела дозволата за работа на компанијата Alta Pay Group, тврди претседателот на СДСМ, Венко Филипче, кој повторно ја критикуваше реакцијата на македонските институции во врска со случајот со Алта банка.

— реклама —

Во објава на социјалната мрежа Х, Филипче оцени дека додека соседните земји преземаат мерки, премиерот Христијан Мицкоски и гувернерот Трајко Славески ги убедуваат граѓаните дека состојбата е стабилна. Тој потсети дека СДСМ уште во декември минатата година предупредувала за сомнежи поврзани со Алта банка, обвинувајќи ја Народната банка дека со месеци не реагирала.

— реклама —

Филипче тврди дека граѓаните се соочуваат со проблеми при пристапот до сопствените средства, бидејќи дел од експозитурите не работат, банкоматите остануваат без пари, а на оние што се во функција се создаваат долги редици. Истовремено, тој прашува зошто на граѓаните им е ограничено располагањето со средствата, доколку целта на мерките е заштита на штедачите.

Лидерот на СДСМ побара од гувернерот Славески да одговори колкави средства биле префрлени од Србија во Македонија, дали останале во земјава или продолжиле кон Москва. Тој оцени дека институциите, откако ја презеле контролата, не можат да се повикуваат на недостиг од информации.

— реклама —

Филипче го доведе во прашање и тврдењето на премиерот Мицкоски дека банката е во „одлична форма“, прашувајќи зошто тогаш на граѓаните им е запрена исплатата на средствата.

— реклама —

Тој побара итна реакција од полицијата и обвинителството, повикувајќи ги институциите да постапуваат во интерес на граѓаните.