Филипче: Зад владините бајки се кријат задолжувања и осиромашување на граѓаните

Претседателот на СДСМ, Венко Филипче, ја критикуваше економската политика на Владата, повикувајќи се на проекциите на Меѓународниот монетарен фонд, според кои Македонија се наоѓа на 41. место меѓу 48 европски економии според проектираниот БДП по жител.

— реклама —

Филипче посочи дека проектираниот БДП по жител изнесува 11.762 долари и дека Србија, Црна Гора и Албанија се пред Македонија во регионалната споредба. Според него, овие податоци ги демантираат тврдењата на премиерот Христијан Мицкоски за Македонија како трета економија во Европа.

— реклама —

„Каква трета економија, Македонија е на дното во Европа. Според ММФ Македонија е на 41 место меѓу 48 европски економии“, рече Филипче.

Тој оцени дека граѓаните секојдневно ги чувствуваат последиците од економската состојба, посочувајќи на високите цени и, како што рече, стагнацијата на платите. Според него, месечните трошоци за четиричлено семејство, заедно со станот, достигнуваат 90.000 денари.

— реклама —

Филипче ја обвини Владата и за ново задолжување од четири милијарди евра во период од две години, како и за недостиг од зголемување на минималната плата. Тој предупреди и на очекувано поскапување на парното и електричната енергија.

— реклама —

Според претседателот на СДСМ, зад, како што ја нарече, пропагандата на власта се крие економска политика што ги задолжува државата и ги осиромашува граѓаните.