„Филипче и Заев соработуваа со луѓе на Вучиќ и во владата за советници вдомуваа негови блиски луѓе од СНС“, вели ВМРО-ДПМНЕ

ВМРО-ДПМНЕ преку соопштение обвини дека поранешниот премиер Зоран Заев и лидерот на СДСМ, Венко Филипче, соработувале со луѓе блиски до српскиот претседател Александар Вучиќ, ангажирајќи ги во македонската влада и во партиските структури на СДСМ.

— реклама —

Од партијата посочуваат на Александар Обрадовиќ и Зоран Башановиќ, за кои тврдат дека биле блиски соработници на Вучиќ и дека Заев ги ангажирал во Македонија. Според ВМРО-ДПМНЕ, Обрадовиќ бил советник на Заев, а во 2021 година станал директор на ќерка-фирма на ЕЛЕМ, откако претходно не успеал обидот да биде назначен за директор на самата компанија.

Од партијата наведуваат и дека Обрадовиќ бил сменет од функцијата директор на Електростопанство на Србија поради, како што тврдат, луксуз и хедонизам.

— реклама —

За Зоран Башановиќ, ВМРО-ДПМНЕ тврди дека е кум на Вучиќ, дека Заев го ангажирал во македонската влада и дека денес е шеф на односи со јавноста на СДСМ. Според партијата, тој заедно со Милјан Шчекиќ ги подготвува соопштенијата и прес-конференциите на партијата.

— реклама —

ВМРО-ДПМНЕ го поврзува Башановиќ и со преговорите меѓу Заев и поранешниот грчки премиер Алексис Ципрас за промената на името на државата, како и со наводни енергетски зделки.

Во соопштението партијата отвора и прашања за договорите во енергетскиот сектор, посочувајќи ја компанијата „Зобек мининг груп“ и нејзината поврзаност со грчката фирма „Лигниторихиа Ахлада“. ВМРО-ДПМНЕ прашува дали тоа влијаело врз доделувањето договор со ЕСМ и повторува дека истата компанија му купила автомобил „Ауди“ на Филипче.

Од ВМРО-ДПМНЕ обвинуваат дека преку вакви кадровски и деловни врски СДСМ, Заев и Филипче го ширеле, како што го нарекуваат, „српскиот свет“ во Македонија и склучувале милионски тендерски зделки со луѓе блиски до Вучиќ.