„Филипче јавно обвини за криминал од 37 милиони евра, сега нека ги достави доказите до ЈО а не да молчи и да се крие“, вели ВМРО-ДПМНЕ

ВМРО-ДПМНЕ преку соопштение го повика лидерот на СДСМ, Венко Филипче, до надлежните институции да ги достави информациите и доказите со кои, како што наведува партијата, јавно изнел сомнежи за злоупотреби при набавката на хеликоптери и договор поврзан со поранешната министерка Славјанка Петровска.

Од ВМРО-ДПМНЕ велат дека Филипче во јавноста говорел за наводна разлика од 37 милиони евра во врска со договорот, поради што, според партијата, случајот треба да биде институционално испитан.

— реклама —

„Ако постојат докази, Филипче треба да ги достави до надлежните институции и целосно да се истражат“, велат од ВМРО-ДПМНЕ.

— реклама —

Од партијата посочуваат дека сериозните обвинувања за можна злоупотреба на јавни средства не треба да бидат дел од внатрепартиски пресметки, туку предмет на постапка пред надлежните институции.

ВМРО-ДПМНЕ смета дека граѓаните имаат право да добијат одговор кој ги носел одлуките, кој ги одобрил набавките и дали со нив бил оштетен државниот буџет.

— реклама —

Партијата го повикува Јавното обвинителство да го повика Филипче на информативен разговор и да ги побара информациите со кои располага, поврзани со случајот.

Од ВМРО-ДПМНЕ воедно се повикуваат на член 364 од Кривичниот законик, наведувајќи дека непријавувањето кривично дело или сторител под определени околности е казниво.

„Очекуваме институционална постапка и одговорност. Секој сомнеж за злоупотреба на јавни средства мора да биде расчистен“, наведуваат од ВМРО-ДПМНЕ.