Филипче: Зарем мислите дека Фон дер Лајен не знае дека Мицкоски ги контролира медиумите?

Претседателот на СДСМ, Венко Филипче, во гостување во емисијата „Тема на денот“ на Сител, говореше за европскиот пат на Македонија, во пресрет на утрешната посета на претседателката на Европската комисија, Урсула фон дер Лајен.

Филипче оцени дека европскиот пат на државата е блокиран и повтори дел од критиките што, како што рече, СДСМ ги упатувал во изминатите две години. Тој посочи на, како што го нарече, српското и унгарското влијание во земјата, како и на унгарскиот кредит преку кој, според него, влегуваат кинески пари.

— реклама —

„Кој е тука за Европа, а кој не е за Европа? Кој работи за доброто на државата, а кој работи против државата? Што ние дополнително да ѝ кажеме на Фон дер Лајен, од она што секојдневно го зборуваме? При тоа се покажа колку точни беа нашите укажувања уште пред две години“, рече Филипче.

— реклама —

Тој додаде дека СДСМ, како што тврди, бил меѓу првите кои укажале на српското влијание, а потоа и на унгарското влијание и унгарскиот кредит.

„Две години наназад укажуваме дека оваа Влада е антиевропска. Дека работи спротивно. Не само на нашите интереси, туку и на интересите на Европската Унија, затоа што проширувањето е едно од приоритетите“, изјави лидерот на СДСМ.

— реклама —

Филипче во интервјуто се осврна и на медиумите, при што постави прашање дали Фон дер Лајен не е запознаена со, како што тврди, влијанието на Унгарија и Србија во медиумскиот простор.

„Зарем мислите дека Фон дер Лајен не знае дека премиерот тука ги контролира медиумите? Над 40 проценти унгарски медиуми, сопственици, пријатели на Виктор Орбан? Вие мислите дека Фон дер Лајен не знае дека противзаконски, дека се регистрирани српски медиуми, тука имаат дозвола за работа“, рече Филипче.

Неговите изјави доаѓаат во пресрет на посетата на Урсула фон дер Лајен на Македонија, при што европскиот пат и односите со Европската Унија се очекува да бидат меѓу темите на разговорите.