Новиот филм на режисерот Кристофер Нолан, „Одисеја“, ќе пристигне во кината дури следниот месец, но веќе поставува рекорди во продажбата на билети.
Најголемото кино-платно во Велика Британија, БФИ ИМАКС во Лондон, соопшти дека во првите 24 часа од почетокот на продажбата биле продадени дури 28.000 билети, со вкупен приход од 750.000 фунти, односно околу еден милион американски долари.
Овој резултат го собори досегашниот рекорд за продажба на билети во првиот ден, кој го држеше филмот „Дина: Втор дел“. Новото остварување на Нолан воедно го надмина и успехот на неговиот претходен блокбастер „Опенхајмер“, кој во истиот период оствари значително помал приход од претпродажба.
Интересот бил толку голем што четири проекции за премиерниот викенд биле распродадени за помалку од еден час, вклучително и специјалната полноќна проекција.
Слична еуфорија владеела и во САД, каде што билети за проекциите на големо платно биле пуштени во продажба една година однапред. За само едно деноноќие биле продадени речиси 150.000 билети, со приход од 3,4 милиони долари.
Големата побарувачка предизвикала пад на интернет-платформите за продажба на билети, а дел од билетите подоцна биле препродавани по цени што достигнувале и до 1.500 долари.
Во актерската екипа на филмот настапуваат Мет Дејмон, Зендаја, Роберт Патинсон, Том Холанд, Ен Хатавеј, Лупита Њонго и Шарлиз Терон.
„Одисеја“ е и првиот филм во историјата што е целосно снимен со 70-милиметарски камери за прикажување на големо платно. Светската премиера е закажана за 17 јули.
