Финска регистрирала напад врз руски воен брод во Балтичкото Море

Финската војска регистрирала напад врз руски воен брод во Финскиот Залив, но соопшти дека безбедносната состојба во регионот и натаму е стабилна и дека земјата не се соочува со непосредна воена закана.

„Финските одбранбени сили регистрираа напад врз руски воен брод во областа на Финскиот Залив и го следеа развојот на ситуацијата“, изјавил портпарол на финската војска за „Ројтерс“.

— реклама —

Естонските медиуми објавија дека станува збор за помал брод на руската воена морнарица, кој по инцидентот се вратил во Санкт Петербург. Неименуван висок фински функционер потврдил за медиумот „Јле“ дека нападот бил регистриран во близина на рускиот остров Гогланд, познат и како Суурсаари, кој се наоѓа на околу 40 километри јужно од финскиот брег и 55 километри северно од Естонија.

Претходно, украинската Служба за безбедност (СБУ) соопшти дека извела операција во која бил погоден рускиот ракетен брод „Наро-Фоминск“, од класата „Бујан-М“, тежок 850 тони. Поради времето и местото на нападот, можно е финските сили да го регистрирале токму овој напад, но засега нема официјална потврда дека станува збор за истиот брод.

— реклама —

„Наро-Фоминск“ ѝ припаѓа на руската Балтичка флота и бил поринат во 2022 година. Опремен е со систем за вертикално лансирање ракети „Калибр-НК“, како и со лансери за крстосувачки ракети „Оникс“, артилериски систем и противвоздушно вооружување.

Од СБУ наведуваат дека нападот бил однапред планиран и изведен во текот на ноќта, како одговор на руската агресија. Според украинската служба, операцијата била дел од поширока акција во која била погодена и нафтената инфраструктура во руското пристаниште Уст-Луга, во Ленинградската област.

— реклама —

Украина во последните денови испраќа бранови воени беспилотни летала кон северозападниот дел на Русија, во кој се наоѓаат Санкт Петербург и балтичкото пристаниште Уст-Луга, едно од главните руски извозни пристаништа за нафта и жито.

Дел од украинските беспилотни летала навлегле и во воздушниот простор на Финска и балтичките земји, предизвикувајќи загриженост дека војната би можела да се прошири и на членки на НАТО кои граничат со Русија и Белорусија.

— реклама —

Естонија, Латвија и Литванија во средата рано наутро издале предупредувања до граѓаните да побараат засолниште поради беспилотните летала во нивниот воздушен простор, а НАТО како одговор подигнал борбени авиони.

Финскиот Залив е тесен дел од Балтичкото Море меѓу Финска и Естонија.