Гнев во Финска откако Гугл незаконски исече 250.000 дрвја за изградба на центар за податоци

Поранешна шума на површина од 330 хектари во близина на Мухос, во северна Финска, сега е претворена во каллива рамнина, откако биле исечени околу 250.000 дрвја за изградба на центар за податоци на Гугл. Случајот предизвика силни реакции во земјата, откако надлежните утврдиле дека компанијата не ги спровела задолжителните процени на влијанието врз животната средина пред сечата.

Мештаните велат дека кафеавата вода од градилиштето се слева во поток, кој потоа се влева во реката Оулујоки. На теренот останале траги од тешките машини, барички и купишта земја, корења и гранки.

— реклама —

„Ова се протега до недоглед“, вели Мари Анала, еколог од Финското друштво за заштита на природата, додека ги гледа снимките од дрон на поранешната шума.

Финска станува сè попривлечна за технолошките компании што градат центри за податоци, поради политичката и геолошката стабилност, достапноста на земјиште и студената клима, која овозможува поевтино ладење на опремата. Според текстот на „Гардијан“, во земјата се планирани 145 нови центри за податоци.

Претходно овој месец, Финската агенција за лиценцирање и надзор му наложила на Гугл привремено да ги запре работите во Мухос и на друга локација во Отанмаки, околу 100 километри југоисточно. Причината е тоа што компанијата не ги спровела задолжителните процени на влијанието врз животната средина пред да ги исече шумите.

— реклама —

Директорот на „Гугл“ Финска, Анти Јарвинен, се извини за сечата, но истакна дека компанијата постапувала според најдоброто разбирање на законските прописи што го имала во тој момент.

Локациите се дел од проектот на Гугл за инфраструктура за вештачка интелигенција вреден 13 милијарди евра. Финската влада ја поддржа инвестицијата, а премиерот Петери Орпо минатиот месец изјави дека привлекувањето инвестиции е еден од највисоките приоритети на земјата и дека економијата заснована на податоци носи придобивки што ги надминуваат директните инвестиции.

— реклама —

Случајот, сепак, отвори прашања за влијанието на ваквите проекти врз локалните заедници, животната средина и цените на енергијата. Анала проценува дека, покрај дрвјата исечени во Мухос, уште 150.000 биле исечени во Отанмаки. Според неа, бидејќи сечата била незаконска, дрвото од овие локации не смее да се продава.

Повеќе од 93.000 луѓе потпишале петиција со која се бара построга регулација на центрите за податоци и надомест за штетата предизвикана на локалните заедници. Претседателката на одборот на Финското друштво за заштита на природата, Хана Халминпаа, изјавила дека била шокирана од информацијата дека компанијата го прекршила законот.

„Тие купија огромно парче земја и само почнаа да сечат. Тоа е чиста ароганција и е неверојатно“, изјавила Халминпаа, додавајќи дека брзината со која се одвиваат ваквите проекти ја изненадила јавноста.

Критики има и за економската корист од центрите за податоци. Јуси Кангашарју, раководител на одделот за компјутерски науки на Универзитетот во Хелсинки, смета дека тие отвораат ограничен број работни места и носат мала корист за националната економија, бидејќи им служат на меѓународни клиенти, а мал дел од корпоративниот данок останува во Финска.

Иако дел од жителите на Мухос и Отанмаки ги поддржуваат проектите поради можностите за вработување и приходите од данокот на земјиште, други сметаат дека локалните власти ги изневериле. Случајот веќе прераснува во поширока дебата за тоа какви услови треба да исполнуваат технолошките компании што сакаат да градат инфраструктура во Финска.