Фолксваген отпушта илјадници работници, но „вработува“ стадо од 100 овци

Наместо косилки и тешка механизација, Фолксваген во Полска ангажираше стадо од 100 овци за одржување на тревата под илјадници соларни панели. Со овој необичен проект компанијата истовремено произведува електрична енергија, ги намалува трошоците за одржување и придонесува за зачувување на природата.

— реклама —

Станува збор за агроволтаичен проект што Фолксваген Познањ го реализира во соработка со компанијата Quanta Energy во фабриката во полскиот град Вжешња. Целта е на иста локација да се спојат производството на енергија од обновливи извори, сточарството и научните истражувања.

— реклама —

Соларната електрана има инсталирана моќност од 18,3 мегавати и е една од најголемите индустриски фотоволтаични централи во Европа. Таа годишно произведува доволно електрична енергија за да покрие околу една четвртина од потребите на фабриката на Фолксваген во Вжешња.

За одржување на тревата, компанијата довела 100 овци од автохтоната полска раса „Вјелкополска“, кои слободно пасат меѓу повеќе од 31.000 соларни панели. На тој начин тревата се одржува на соодветна висина без употреба на специјализирана механизација, додека панелите им обезбедуваат сенка и заштита од дожд, силно сонце и други неповолни временски услови.

— реклама —

Проектот има и научна димензија. Истражувачи од Универзитетот во Познањ го следат влијанието на овците врз биолошката разновидност, квалитетот на почвата, микроклимата и благосостојбата на животните, со цел да утврдат дали овој модел може да стане пример за одржливо управување со големи соларни електрани.

— реклама —

Иницијативата доаѓа во период кога Фолксваген најавува значително намалување на бројот на вработени во наредните години, но овојпат вниманието е насочено кон необичните „работници“ кои секојдневно се грижат за зелените површини околу една од најголемите соларни електрани во Европа.