„Фолксваген“ подготвува историско реструктуирање: до 100.000 откази и затворање на четири фабрики

Германскиот автомобилски гигант „Фолксваген“ разгледува план за најголемото реструктуирање во својата историја, кое би можело да опфати отпуштање на до 100.000 работници и затворање на четири фабрики во Германија.

Како што пренесуваат германските медиуми, Надзорниот одбор на компанијата неодамна одржал состанок во Волфсбург, но наместо конечна одлука, започнале преговори за обемните мерки што треба да ја подобрат профитабилноста на компанијата.

— реклама —

Извршниот директор Оливер Блуме изјави дека проблемот не е во побарувачката за возилата, туку во ниската заработка од секој продаден автомобил.

— реклама —

„Нашите производи се многу барани, но не заработуваме доволно од нив. Затоа мора дополнително да ги намалиме трошоците“, изјави Блуме за германскиот весник „Билд“.

Покрај отпуштањата, „Фолксваген“ размислува и за значително намалување на понудата на модели. Според неофицијалните информации, до половина од моделите на брендовите што се дел од групацијата – меѓу кои „Ауди“, „Шкода“, „Порше“, „СЕАТ“, „Купра“, „Ламборџини“ и „Бентли“ – би можеле постепено да бидат повлечени од производство.

— реклама —

Компанијата планира и намалување на бројот на достапни верзии и опции за преостанатите модели, со цел да ги намали трошоците и да се насочи кон најпрофитабилните возила.

„Фолксваген“ се соочува со силен притисок од кинеските производители на електрични автомобили, пад на профитните маржи и американските царини за увоз на автомобили. Дополнителен проблем е слабеењето на продажбата во Кина, која со години беше најважниот пазар за германската компанија.

Иако синдикатите се противат на предложените мерки, аналитичарите оценуваат дека компанијата ќе мора да спроведе подлабоки реформи, вклучувајќи поголема автоматизација на производството и дополнително намалување на трошоците, за да остане конкурентна на глобалниот автомобилски пазар.